गांधीनगर : हिंदवी स्वराज्याचे संस्थापक, युगपुरुष शिवाजी महाराज यांच्या भव्य अश्वारूढ पुतळ्याचे अनावरण केंद्रीय गृहमंत्री अमित शाह यांच्या हस्ते मंगळवार १७ फेब्रुवारी रोजी सायंकाळी ५ वाजता गांधीनगर ( गुजरात) येथे करण्यात येणार आहे. हा पुतळा गांधीनगरमधील समस्त महाराष्ट्र समाज मंडळाच्या वतीने उभारण्यात आला आहे.
केंद्रीय मंत्री अमित शाह यांच्या अध्यक्षतेखाली होणाऱ्या या कार्यक्रमाला गुजरातचे मुख्यमंत्री भूपेंद्र पटेल, उपमुख्यमंत्री हर्ष संघवी, तसेच गुजरात भाजप प्रदेशाध्यक्ष जगदीश पंचाळ आदींची उपस्थिती असेल. यावेळी पुण्यातील लोकमान्य बहुउद्देशीय सहकारी संस्था शिवाजी महाराजांच्या जीवनावरील शिवप्रताप महानाटक हे नाटक सादर करेल.
महाराष्ट्र समाज मंडळाच्या वतीने उभारण्यात आलेला सदर पुतळा एकूण २० फूट उंचीचा असून पुतळ्याचे वजन ८५० किलो आहे. पुतळ्याचा चौथारा ८ फुटाचा असून ७ फुटाचा घोडा तर पाच फुटांची शिवरायांची प्रतिकृती आहे. या पुतळ्यासाठी संपूर्ण फायबर साहित्याचा वापर करण्यात आला आहे. या पुतळ्याच्या अनावरणासाठी अहमदाबाद, गांधीनगर, राजकोट, सुरत, कलोल, दोड्डासह गुजरातमधील समस्त मराठी जन उपस्थित राहणार आहेत.
छत्रपती शिवाजी महाराजांचा पुतळा उभारण्यामागे स्वराज्य, पराक्रम, राष्ट्रप्रेम आणि न्यायाचे प्रतीक म्हणून त्यांच्या स्मृती चिरंतन ठेवण्याची, तसेच भावी पिढीला प्रेरणा मिळावी अशी आमची भावना आहे. हा पुतळा शिवरायांचे नेतृत्व, दूरदृष्टी आणि मराठी अस्मितेची आठवण करून देणारे एक सांस्कृतिक व ऐतिहासिक प्रतीक म्हणून स्थापित करत आहोतच परंतु हा पुतळा अन्यायाविरुद्ध लढण्याची, प्रगत विचारांची आणि स्वदेशाभिमानाची ऊर्जा देणारा ठरेल. महाराजांचे कार्य, वीरता आणि शौर्य यांची भावी पिढीला जाणीव व्हावी, आणि त्यातून देशभक्तीची भावना निर्माण व्हावी, हा मुख्य उद्देश आहे. शिवाजी महाराजांचा हा केवळ पुतळा नसून, तो एका महान नेतृत्वाच्या विचारांचे आणि कार्याचे प्रतीक म्हणून तो आम्ही गांधीनगर मध्ये उभा करीत आहोत असे गांधीनगर मराठी समाज मंडळाचे विश्वस्त दत्ताजी पाटील यांनी सांगितले.