नेपाळमधील निवडणुकीचे निकाल आता टप्प्याटप्प्याने समोर येऊ लागले आहेत. सुरुवातीच्या कलांमध्ये बालेन शाह यांच्या पक्षाची जोरदार आघाडी दिसून येत आहे. प्रारंभीच्या निकालांनुसार बालेन शाह यांच्या राष्ट्रीय स्वतंत्र पार्टीला (RSP) मोठे यश मिळताना दिसत असून पारंपरिक राजकीय पक्षांना मोठा फटका बसत आहे.
मिळालेल्या माहितीनुसार सध्या ६१ जागांवरील मतमोजणी सुरू आहे. त्यापैकी ५२ जागांवर बालेन शाह यांचा पक्ष आघाडीवर आहे. तर नेपाळी काँग्रेस ५ आणि यूएमएल ४ जागांवर पुढे असल्याचे चित्र आहे. याशिवाय माजी पंतप्रधान केपी शर्मा ओली यांच्यासह अनेक माजी पंतप्रधान, उपपंतप्रधान आणि मंत्री सध्या मतमोजणीत मागे असल्याचेही समोर आले आहे.
नेपाळमध्ये गुरुवारी (५ मार्च) मोठ्या उत्साहात मतदान पार पडले. Gen Z च्या आंदोलनानंतर देशात प्रथमच ही सार्वत्रिक निवडणूक होत आहे. या आंदोलनामुळे केपी शर्मा ओली यांच्या नेतृत्वाखालील आघाडी सरकार कोसळले होते. या निवडणुकीत भ्रष्टाचाराचा मुद्दा प्रमुख ठरल्याचेही पाहायला मिळाले.
बालेन शाह यांची वाढती लोकप्रियता :
प्रसिद्ध रॅपर आणि इंजिनिअर म्हणून ओळख असलेले बालेन शाह आता प्रभावी राजकीय नेते म्हणून पुढे येत आहेत. काठमांडूचे महापौर म्हणून त्यांनी काम केले असून त्यांच्या नेतृत्वाखाली राष्ट्रीय स्वतंत्र पार्टी (RSP) या नव्या पक्षाने नेपाळमधील दोन जुन्या राजकीय पक्षांना मोठे आव्हान दिले आहे. २०२२ मध्ये स्थापन झालेल्या या पक्षाला प्रचारादरम्यान जनतेचा मोठा पाठिंबा मिळाला. त्यामुळे बालेन शाह यांना पंतप्रधानपदाचे प्रमुख दावेदार मानले जात आहे.
नेपाळमध्ये एकूण २७५ जागांसाठी निवडणूक होत आहे. यापैकी १६५ सदस्य थेट मतदानातून निवडले जातात, तर उर्वरित ११० सदस्य प्रोपोर्शनल रिप्रेझेंटेशन (PR) पद्धतीने निवडले जातात. थेट निवडणुकीसाठी ३४०० उमेदवार मैदानात होते, तर PR कोट्यातील ११० जागांसाठी ३१३५ उमेदवार रिंगणात होते.