जयपूर : राजस्थानमधील अलवर येथे पतीच्या हत्येचा कट रचल्याची धक्कादायक घटना समोर आली आहे. एका बँक अधिकाऱ्याच्या पत्नीने आपल्या प्रियकराच्या मदतीने पतीचा जीव घेण्याचे नियोजन केले होते. मात्र, एका ऑडिओ क्लिपमुळे हा संपूर्ण कट उघडकीस आला आणि पोलिसांनी तातडीने कारवाई करत दोघांना अटक केली.
प्रेमसंबंधातून कटाची सुरुवात
पोलिसांनी दिलेल्या माहितीनुसार, अर्चना अरोरा आणि टॅक्सी ड्रायव्हर ऋषभ शर्मा यांच्यात काही काळापासून प्रेमसंबंध होते. दोघांना एकत्र राहायचे होते, मात्र अर्चनाचा पती त्यांच्या मार्गात अडथळा ठरत असल्याने त्यांनी त्याला हटवण्याचा निर्णय घेतला, या कटाच्या आधी अर्चनाने घरातील रोख रक्कम आणि दागिने घेऊन घर सोडल्याची माहिती समोर आली आहे. त्यानंतर दोघांनी एकत्र येऊन पतीच्या हत्येचे नियोजन केल्याचे पोलिसांनी सांगितले.
ऑडिओ क्लिपमुळे कटाचा पर्दाफाश
पतीच्या हत्येचा संपूर्ण कट जवळपास तयार असताना, एका ऑडिओ क्लिपमुळे पोलिसांना या प्रकरणाची माहिती मिळाली. या क्लिपमध्ये संशयास्पद संभाषण आढळून आल्यानंतर पोलिसांनी तपास सुरू केला आणि आरोपींपर्यंत पोहोचण्यात यश मिळवले. तांत्रिक तपास आणि पुराव्यांच्या आधारे पोलिसांनी अर्चना अरोरा आणि ऋषभ शर्मा या दोघांना अटक केली आहे. या प्रकरणात आणखी कोणाचा सहभाग आहे का, याचाही तपास सुरू आहे. या घटनेमुळे स्थानिक परिसरात खळबळ उडाली असून, पोलिसांकडून दोन्ही आरोपींची सखोल चौकशी सुरू आहे. या प्रकरणातील पुढील तपासातून आणखी माहिती समोर येण्याची शक्यता व्यक्त केली जात आहे.
