विशिष्ट धर्माचा ग्रंथ हेतुपुरस्कर वाचण्यास सांगणे , गोमांस खाण्यास बळजबरी करणे, महिलांना धमकावणे, अश्लील भाषेचा प्रयोग करणे, कृत्य करणे असे काही संतापजनक प्रकार कंपनीत होत असल्याचे कंपनीतील पीडित कर्मचाऱ्यांकडून सांगण्यात आले आहे. आता कंपनीतील आणखी एक खळबळजनक प्रकरण समोर आले आहे. कंपनीत स्थानिक पातळीवरील नेटचे पासवर्ड देखील अश्लील भाषेत दिले जात होते. यातून अनेकदा धार्मिक भावना देखील दुखावल्या जात होत्या, अशी आपबिती एका पीडितेने सांगितली.
पीडितेने सांगितले की, ती तीन वर्षांपूर्वी (TCS) कंपनीत ट्रेनी कर्मचारी म्हणून लागली होती. तेव्हा रजा मेनन याने तिचा छळ केला, तिच्याशी तो अश्लील भाषेत संभाषण करू लागला. याविषयी तिने ऑपरेशन मॅनेजर आश्विनी चैनानी हिच्याकडे तोंडी तक्रार केली मात्र तिच्या तक्रारीकडे दुर्लक्ष केले गेले, मात्र यामुळे चिडलेल्या रजा याने अटकेतील आरोपी दानिश, तसेच तौसिफच्या सोबतीने तिचा अधिक छळ सुरू केला. डिजिटल पाठलाग केला, तसेच कंपनीत तिच्याबाबत नको ती अफवा पसरविली असा जबाब पीडितेने दिला आहे.
रजा हा ट्रेनी केबिनमध्ये प्रवेश करून अश्लील बोलायचा. तसेच पदाचा दुरुपयोग करून कामावरून काढून टाकण्याचा दम द्यायचा, असा जबाब फिर्यादीने दिलाय. व्हॉट्सअॅपवर रात्री उशिरा तू काय करतेय, रात्री काय करते वैगेरे नको ते प्रश्न विचारून मानसिक छळ करायचा असा जबाब देखील संबंधित पीडितेने दिला आहे.
टीसीएस कंपनीतील धर्मांतराचा प्रयत्न तसेच लैंगिग अत्याचारप्रकरणी अटकेत असलेला प्रमुख संशयित आरोपी दानिश एजाज शेख याचा अंतरिम जामीन जिल्हा सत्र न्यायालयाने फेटाळून लावत अटकपूर्व जामिनासाठी पुढील सुनावणी २७ एप्रिल रोजी घेण्याचे आदेश दिले. त्यामुळे दानिशचा कारागृहातील मुक्काम वाढला आहे.दानिशवर धार्मिक भावना दुखावणे तसेच महिलेशी गैरवर्तन केल्याचे आरोप असून, त्याच्यावर दाखल एकूण नऊ गुन्ह्याचे गांभीर्य लक्षात घेऊन न्यायालयाने आरोपीला दिलासा देण्यास नकार दिला असल्याची माहिती सरकारी अभियोक्ता किरण बेंडभर यांनी दिली.