मुंबई : राज्यातील ‘लाडक्या बहिणीं’साठी विविध योजनांचा धडाका लावल्यानंतर आता महायुती सरकार महिला सक्षमीकरणाच्या मुद्द्यावर देशपातळीवर निर्णायक भूमिका घेण्याच्या तयारीत आहे. महिला आरक्षणाला पाठिंबा दर्शवण्यासाठी मे महिन्यात राज्य विधिमंडळाचे एक दिवसीय विशेष अधिवेशन बोलावण्याचे संकेत विश्वसनीय सूत्रांनी दिले आहेत. या अधिवेशनाच्या माध्यमातून महिला आरक्षणाचा मार्ग प्रशस्त करण्यासोबतच विरोधकांची कोंडी करण्याची रणनीती सत्ताधारी पक्षाने आखल्याचे समजते.
महिला आरक्षण विधेयक अर्थात ‘नारी शक्ती वंदन विधेयक’ संसदेत नामंजूर झाल्यानंतर, या मुद्द्यावर विरोधकांचा दुटप्पी चेहरा जनतेसमोर उघडा करण्यासाठी भाजपने देशव्यापी मोहीम हाती घेतली आहे. त्याचाच एक भाग म्हणून महाराष्ट्रात हे विशेष अधिवेशन घेण्याचे नियोजन सुरू आहे. या एक दिवसीय कामकाजात सर्वपक्षीय आमदारांना आपली भूमिका मांडण्याची संधी मिळणार असून, आरक्षणाला पाठिंबा देणारा ठराव याद्वारे संमत केला जाण्याची शक्यता आहे.
मे महिन्यात हे अधिवेशन पार पडणार असले तरी, त्याची निश्चित तारीख अद्याप प्रशासकीय स्तरावर ठरलेली नाही. मात्र, लवकरच मंत्रिमंडळ बैठकीत यावर शिक्कामोर्तब होऊन तारीख जाहीर केली जाईल. या अधिवेशनामुळे राज्यातील राजकीय वातावरण पुन्हा एकदा तापण्याची चिन्हे असून, महाविकास आघाडी या विशेष अधिवेशनाला कशा प्रकारे सामोरी जाते, हे पाहणे औत्सुक्याचे ठरेल.