अहिल्यानगर : वाकोडी ते बाबुर्डी (ता. नगर) रस्त्यावर किरकोळ शिवीगाळ तरुणाच्या जिवावर बेतलीय. किरकोळ वादातून दोघांनी थेट एकाची ऊसाच्या शेतात नेऊन कृर हत्या केली. तर पुरावा नष्ट करण्यासाठी मृतदेह पोत्यात भरून ऊसाच्या शेतात आरोपींनी फेकून दिला. भिंगार कॅम्प पोलिसांनी जलद तपास करत दोन संशयितांना अटक केली असून त्यांनी गुन्ह्याची कबुली दिली आहे. प्रसाद रोहीदास जाधव (वय 39, रा. वाकोडी फाटा) असे मृत तरूणाचे नाव आहे.
ही घटना 26 एप्रिल रोजी घडली. (Ahilyanagar Crime News )
मयताच्या पत्नीने भिंगार कॅम्प पोलिस ठाण्यात (Bhingar Camp Police Station) मिसिंगची तक्रार दिली होती. पोलिसांनी दोन दिवसांत क्लिष्ट गुन्ह्याचा तपास करून दोघांच्या मुसक्या आवळल्या. याप्रकरणात पोलिसांनी शुभम हरी भोसले (वय 20) आणि समाधान उर्फ बाळ्या रामदास सोनवणे (वय 42, दोघे रा. वाकोडी फाटा) यांना अटक केली आली आहे.
नेमकं काय घडलं ?
प्रसाद जाधव हे 26 एप्रिल रोजी दुपारी न्यू आर्ट्स कॉलेज येथे पेपर देण्यासाठी घरातून बाहेर पडले होते. मात्र ते परत न आल्याने त्यांच्या कुटुंबीयांनी दुसर्‍या दिवशी हरवल्याची तक्रार नोंदवली. त्यानंतर पोलिसांनी परिसरातील सीसीटीव्ही फुटेजची तपासणी सुरू केली. तपासादरम्यान बुरूडगाव रस्ता परिसरात प्रसाद यांच्यासोबत दोन संशयित दिसून आले. त्याआधारे पोलिसांनी शोधमोहीम राबवत शुभम भोसले आणि समाधान सोनवणे यांना ताब्यात घेतले. चौकशीदरम्यान दोघांनी धक्कादायक कबुली दिली. (Ahilyanagar Crime News )
दारूच्या नशेत शिवीगाळ केल्याचा संताप अनावर
26 एप्रिल रोजी रात्री साडेआठच्या सुमारास बुरूडगाव ते बाबुर्डी रस्त्यावर त्यांना एका व्यक्तीने दारूच्या नशेत शिवीगाळ केली. या प्रकारामुळे संतप्त होऊन त्यांनी त्या व्यक्तीला दुचाकीवर बसवून वाकोडी शिवारातील उसाच्या शेतात नेले. तेथे लाकडी दांडक्याने आणि दगडाने डोक्यावर व तोंडावर वार करत त्याचा खून केला. गुन्ह्यानंतर पुरावा नष्ट करण्याच्या उद्देशाने मृतदेह पोत्यात भरून शेतात टाकण्यात आला.
तसेच मृताची दुचाकी सिना नदी पुलाजवळील झुडपात लपवून ठेवण्यात आली होती. संशयितांच्या कबुलीनुसार पोलिसांनी (Bhingar Camp Police Station) शोध घेतला असता वाकोडी शिवारातील गट क्रमांक 158 मधील उसाच्या शेतात पोत्यात भरलेला मृतदेह आढळून आला. ओळख पटवल्यानंतर तो प्रसाद जाधव यांचाच असल्याचे स्पष्ट झाले. या प्रकरणी पोलिसांनी दोन्ही संशयित आरोपींविरूध्द खुनाचा गुन्हा दाखल केला असून पुढील तपास सुरू आहे.