मुंबई : रितेश देशमुखचा ‘राजा शिवाजी’ हा मराठी चित्रपट बॉक्स ऑफिसवर एकामागोमाग एक विक्रम मोडत आता नवा इतिहास रचण्याच्या तयारीत आहे. ‘वेड’नंतर ‘बाईपण भारी देवा’ या सुपरहिट सिनेमालाही मागे टाकत ‘राजा शिवाजी’ आता ‘सैराट’ला जोरदार टक्कर देताना दिसत आहे.
१ मे २०२६ रोजी प्रदर्शित झालेल्या या चित्रपटाने पहिल्याच दिवशी तब्बल ११.३५ कोटी रुपयांची कमाई करत मराठी चित्रपटसृष्टीतील सर्वात मोठा ओपनर ठरण्याचा मान पटकावला. रिलीजच्या पहिल्या शनिवारी सिनेमाने १०.५५ कोटी रुपयांची कमाई केली, तर रविवारी तब्बल १२ कोटींचा गल्ला जमवत सर्वांनाच आश्चर्याचा धक्का दिला. यासह ओपनिंग वीकेंडला सर्वाधिक कमाई करणारा मराठी चित्रपट म्हणूनही ‘राजा शिवाजी’ने विक्रम आपल्या नावावर केला.
चित्रपटाची भारतातील निव्वळ कमाई पहिल्याच आठवड्यात ५७.७० कोटी रुपयांवर पोहोचली. विशेष म्हणजे पहिल्याच आठवड्यात ५० कोटींचा टप्पा पार करणारा हा पहिला मराठी चित्रपट ठरला आहे. त्यामुळे ‘राजा शिवाजी’ने बॉक्स ऑफिसवर नवा इतिहास घडवला.
दुसऱ्या आठवड्यातही या चित्रपटाची घोडदौड कायम राहिली. ७५.१० कोटी रुपयांच्या निव्वळ कमाईसह ‘राजा शिवाजी’ने ‘वेड’ चित्रपटाचा सर्वाधिक कमाईचा विक्रम मोडला. यानंतर सर्वाधिक कमाई करणाऱ्या मराठी चित्रपटांच्या यादीत हा सिनेमा तिसऱ्या स्थानावर पोहोचला.
आता तिसऱ्या आठवड्यात ‘राजा शिवाजी’ने आणखी एक मोठा पराक्रम केला आहे. ‘बाईपण भारी देवा’ या सुपरहिट सिनेमालाही कमाईच्या बाबतीत मागे टाकत या चित्रपटाने सर्वाधिक कमाई करणाऱ्या मराठी चित्रपटांच्या यादीत दुसरे स्थान पटकावले आहे.
सॅकनिल्कच्या रिपोर्टनुसार, तिसऱ्या रविवारी म्हणजेच १७ व्या दिवशी या चित्रपटाने तब्बल ३.०५ कोटी रुपयांची कमाई केली. यासह चित्रपटाची एकूण कमाई ८४.१५ कोटी रुपयांवर पोहोचली आहे.
‘राजा शिवाजी’ने आतापर्यंत तब्बल ५ मोठे विक्रम आपल्या नावावर केले आहेत. पहिल्या दिवशी सर्वाधिक कमाई करणारा मराठी चित्रपट, पहिल्या वीकेंडला सर्वाधिक गल्ला जमवणारा चित्रपट, पहिल्याच आठवड्यात ५० कोटींचा टप्पा पार करणारा पहिला मराठी चित्रपट, तसेच ‘वेड’ आणि ‘बाईपण भारी देवा’चे रेकॉर्ड मोडत सर्वाधिक कमाई करणारा दुसरा मराठी चित्रपट असा हा विक्रमांचा सिलसिला सुरू आहे.