नाशिक : नाशिकरोड परिसरातील कारागृह अधिकाऱ्यांच्या निवासस्थानाबाहेर रात्री उशिरापर्यंत मद्यपार्टी रंगल्याची धक्कादायक घटना समोर आली आहे. विशेष म्हणजे या पार्टीत एका संशयित आरोपीची उपस्थितीने सर्वांच्याच भुवया उंचावल्या आहेत. कारागृहातील तीन वरिष्ठ तुरुंग अधिकारी चक्क फसवणुकीच्या गुन्ह्यातील एका कुख्यात आरोपीसोबत राजरोसपणे दारू पार्टी करत असल्याचे व्हिडिओ सोशल मीडियावर व्हायरल होत आहे.
शासकीय नियमांची पुरती ऐशीतैशी करत या अधिकाऱ्यांनी चक्क कारागृह परिसरातील आपल्या निवासस्थानासमोरच मद्यपार्टीचा आनंद घेतल्याने पोलिसांच्या भूमिकेवर प्रश्नचिन्ह उपस्थित होत आहे. मिळालेल्या माहितीनुसार, कारागृहाचे तिघे वरिष्ठ तुरुंग अधिकारी या व्हिडिओमध्ये आरोपीसोबत मद्य पार्टीचा आनंद घेताना स्पष्ट दिसत आहेत. धकाकदायक म्हणजे आरोपी हा फसवणुकीच्या गुन्ह्यात याच नाशिकरोड कारागृहात दोन वेळेस शिक्षा भोगून सध्या जामिनावर बाहेर आहे. त्याचे नाव गौरव असल्याची माहिती आहे.
खरेतर कोणत्याही पोलीस किंवा कारागृह अधिकाऱ्याला आरोपीशी कुठल्याही प्रकारचे संबंध ठेवण्यास कायद्याने सक्त मनाई आहे. मात्र, या तिन्ही अधिकाऱ्यांनी सर्व नियम धाब्यावर बसवून, याच आरोपीच्या पैशांवर मद्याच्या सुरावटी उडवल्याचे प्राथमिक चौकशीत समोर येत आहे. हा व्हिडिओ समोर आल्यानंतर नाशिकरोड परिसरात आणि पोलीस वर्तुळात एकच खळबळ माजली असून अनेक गंभीर प्रश्न उपस्थित होत आहेत.
या संपूर्ण प्रकरणातील मुख्य सूत्रधार आणि एका वरिष्ठ अधिकारी याचा इतिहास आधीपासूनच डागांनी माखलेला आहे. यापूर्वी अनेकदा वरिष्ठांचे आदेश डावलल्यामुळे त्याला तब्बल तीन वेळा निलंबित करण्यात आलेले आहे. त्यांच्यावर यापूर्वी गंभीर गैरवर्तणुकीचे ठपके ठेवण्यात आले आहेत. एका प्रकरणात तर थेट आरोपीच्या पत्नीकडून आर्थिक फायदा लाटून आरोपीला मदत केल्याचा गंभीर आरोपही त्यांच्यावर सिद्ध झालेला आहे. तरीही, सुधारण्याची कोणतीही चिन्हे न दाखवता या अधिकाऱ्याने पुन्हा एकदा शासकीय जागेतच आरोपीसोबत मैफल जमवून कारागृह प्रशासनाची नाचक्की केल्याची चर्चा कारागृह रक्षकांमध्ये आहे. दरम्यान आता या तिन्ही अधिकाऱ्यांवर आता काय कारवाई होते, याकडे नाशिककरांचे लक्ष लागले आहे.