Nashik : अहिल्यानगर (Ahilyanagar) येथे कार्यरत असलेला पोलीस उपनिरीक्षक जयेश गांगुर्डे याला लाचलुचपत प्रतिबंधक विभागाच्या पथकाने नाशिकमधून (Nashik) ताब्यात घेतले आहे. पदोन्नती मिळून बदली झाल्यानंतरही एक लाख रुपयांच्या लाचेची मागणी करणारा पोलीस उपनिरीक्षक जयेश गांगुर्डे (Police Sub-Inspector Jayesh Gangurde) लाचलुचपत प्रतिबंधक विभागाने अटक केली आहे.
नेमकं प्रकरण काय ?
पोलीस उपनिरीक्षक जयेश गांगुर्डे हा अहिल्यानगर तालुका पोलीस ठाण्यात (Ahilyanagar Taluka Police Station) कार्यरत होता. पदोन्नतीनंतर त्याची अहिल्यानगरमधून नाशिकला बदली झाली. तक्रारदाराचे मामा व इतर १५ आरोपींविरोधात तालुका पोलीस ठाण्यात ११ मे रोजी गुन्हा दाखल झाला आहे. एकाच कुटुंबातील व्यक्तींविरोधात हा गुन्हा दाखल आहे. या गुन्ह्याचा तपास उपनिरीक्षक जयेश गांगुर्डे याच्याकडे होता. या गुन्ह्यांमध्ये मदत करण्यासाठी आणि नातेवाईकांची नावे वगळण्यासाठी गांगुर्डे याने सुरुवातीला २ लाख रुपये लाचेची मागणी केली होती.
या विरोधात तक्रारदाराने लाचलुचपत प्रतिबंधक विभागाकडे (Anti-Corruption Department) तक्रार दिली. विभागाच्या पथकाने पंचासमक्ष या तक्रारीची पडताळणी केली. शहरातील पोलीस मुख्यालयाच्या प्रवेशद्वाराजवळ झालेल्या संभाषणादरम्यान गांगुर्डे याने तडजोडीअंती एक लाख रुपये लाच घेण्याचे मान्य केले. लाचेची रक्कम पोलीस मुख्यालय परिसरात स्वीकारण्याचे निश्चित झाले होते. त्याने लाचेची मागणी करून ती स्वीकारण्याची तयारी दर्शवल्याचे उघड झाल्याने त्याच्याविरुद्ध तोफखाना पोलीस ठाण्यात (Topkhana Police Station) गुन्हा दाखल करण्यात आला आहे. त्याला नाशिकमधून ताब्यात घेऊन नगरला आणण्यात आले.
आठ दिवसांपूर्वीच सहायक पोलीस निरीक्षकपदी पदोन्नती
आठ दिवसांपूर्वीच नाशिक येथे उपनिरीक्षक गांगुर्डे याची सहायक पोलीस निरीक्षकपदी पदोन्नती झाली होती. पदोन्नतीनंतर त्याला कार्यमुक्त करण्यात आले नव्हते. अहिल्या नगर शहरातील पोलीस मुख्यालयात (Police Headquarters AhilyaNagar) सुरू असलेल्या प्रशिक्षणासाठी त्याला पाठविण्यात आले होते. तेथे त्याने तक्रारदार यांच्याकडे लाचेची मागणी केली. त्यामुळे त्यांनी तक्रारदाराला मुख्यालयाच्या प्रवेशद्वाराजवळ बोलावून घेतली होते. हा प्रकार सुरू असतानाच दरम्यान, त्याला मंगळवारी तालुका पोलीस ठाण्यातून (Ahilyanagar Taluka Police Station) कार्यमुक्त करण्यात आले आणि काल, बुधवारी त्याच्याविरूध्द गुन्हा दाखल करण्यात आला आहे.
लाचलुचपत प्रतिबंधक विभागाचे (Anti-Corruption Department) पोलीस उपअधीक्षक अजित त्रिपुटे यांच्या मार्गदर्शनाखाली निरीक्षक राजू आल्हाट, अंमलदार चंद्रकांत काळे, किशोर कुळधर, शेखर वाघ यांच्या पथकने ही कारवाई केली. अधिक तपास पोलीस निरीक्षक छाया देवरे करत आहेत.