बॉलिवूड : बॉलिवूड अभिनेत्री सनी लिओनी (Sunny Leone) हिचे नाव कर्नाटकातील कथित 2400 कोटी रुपयांच्या गुंतवणूक घोटाळ्याशी (Investment Scam) संबंधित तपासात समोर आल्याने खळबळ उडाली आहे. या प्रकरणी कर्नाटक सीआयडीने (CID) सनी लिओनीला नोटीस बजावून काही आर्थिक व्यवहारांबाबत माहिती मागवली आहे. (Sunny Leone)
मिळालेल्या माहितीनुसार, 'शिवम असोसिएट्स' आणि त्याचे प्रवर्तक शिवानंद नीलन्नवर (Shivanand Neelannavar) यांच्यावर बेकायदेशीर गुंतवणूक योजनांच्या माध्यमातून सुमारे चार लाख गुंतवणूकदारांकडून हजारो कोटी रुपये उभारल्याचा आरोप आहे. या प्रकरणाचा तपास सध्या सीआयडीकडून सुरू असून आर्थिक व्यवहारांचे धागेदोरे शोधले जात आहेत.
तपासादरम्यान समोर आलेल्या माहितीनुसार, 2023 मध्ये प्रदर्शित झालेल्या चॅम्पेयन या कन्नड चित्रपटाची निर्मिती शिवानंद नीलण्णवर यांनी केली होती. या चित्रपटातील लोकप्रिय 'डिंगारा बिल्ली नानू' गाण्यात सनी लिओनीने विशेष भूमिका साकारली होती. या गाण्यासाठी तिला सुमारे एक कोटी रुपयांचे मानधन देण्यात आल्याची माहिती तपास यंत्रणांना मिळाली आहे.
सीआयडी सध्या या मानधनासाठी वापरण्यात आलेल्या निधीचा स्रोत आणि पैशांच्या व्यवहारांचा तपशील तपासत आहे. याच पार्श्वभूमीवर सनी लिओनीला नोटीस पाठवून माहिती मागवण्यात आली आहे.
मात्र, तपास यंत्रणांनी स्पष्ट केले आहे की, सनी लिओनीविरोधात सध्या कोणताही गुन्हा दाखल करण्यात आलेला नाही किंवा तिच्यावर फसवणुकीचे आरोप करण्यात आलेले नाहीत. तिला केवळ माहिती आणि चौकशीच्या उद्देशाने नोटीस बजावण्यात आली असून तपासाचा केंद्रबिंदू आर्थिक व्यवहार आणि निधीचा स्रोत हा आहे.
दरम्यान, या घोटाळ्याच्या तपासात अनेक आर्थिक व्यवहारांची चौकशी सुरू असून सीआयडीकडून संबंधित कागदपत्रे आणि व्यवहारांची पडताळणी केली जात आहे. त्यामुळे या प्रकरणात पुढे आणखी कोणती माहिती समोर येते, याकडे सर्वांचे लक्ष लागले आहे.