मुंबई : बॉलिवूडचे प्रसिद्ध संगीतकार प्रीतम चक्रवर्ती (Music composer Pritam Chakraborty) यांनी १४ जून रोजी वाढदिवसानिमित्त सोशल मीडियावर (Social Media) केलेल्या एका भावनिक पोस्टमुळे चाहत्यांमध्ये त्यांच्या निवृत्तीबाबत चर्चा सुरू झाली आहे. गेली दोन दशके हिंदी चित्रपटसृष्टीला एकापेक्षा एक सुपरहिट गाणी देणाऱ्या प्रीतम यांच्या पोस्टने अनेकांच्या भुवया उंचावल्या आहेत.
वाढदिवसानिमित्त शेअर केलेल्या पोस्टमध्ये प्रीतम यांनी लिहिले की, "सर्व शुभेच्छांसाठी धन्यवाद. प्रत्येकाला वैयक्तिकरित्या उत्तर देणे शक्य नसले तरी माझे मनःपूर्वक आभार स्वीकारा. आज मी स्वतःला काही वर्षे वेगळ्या पद्धतीने जगण्याची भेट देत आहे. आयुष्यात जे काही राहून गेले, ते पुन्हा अनुभवण्याची वेळ आली आहे. आता एका नव्या प्रवासाला सुरुवात करण्याची वेळ आली आहे, जो अनेक वर्षांपासून प्रलंबित होता."
पुढे त्यांनी म्हटले की, "मेनस्ट्रीम हा एक सुंदर प्रवास होता. मात्र, मला नेहमीच न शोधलेल्या वाटांविषयी अधिक उत्सुकता वाटत आली आहे. तुमच्या प्रेम आणि पाठिंब्यासाठी मनापासून धन्यवाद."
या पोस्टनंतर सोशल मीडियावर प्रीतम यांच्या निवृत्तीच्या चर्चांना उधाण आले आहे. मात्र त्यांनी संगीत क्षेत्रातून निवृत्ती घेत असल्याचे कुठेही स्पष्टपणे नमूद केलेले नाही. त्यामुळे ही पोस्ट नव्या आयुष्याच्या टप्प्याची किंवा वेगळ्या सर्जनशील प्रवासाची सुरुवात असल्याचीही शक्यता व्यक्त केली जात आहे.
सध्या ५५ वर्षांचे असलेले प्रीतम हे बॉलिवूडमधील सर्वाधिक लोकप्रिय संगीतकारांपैकी एक आहेत. अरिजीत सिंह यांच्यासोबत त्यांनी अनेक सुपरहिट गाणी दिली आहेत. त्यांच्या संगीताने सजलेली 'केसरिया', 'चन्ना मेरेया', 'हवाएं', 'तुम से ही', 'तू जाने ना', 'कबीरा', 'बलम पिचकारी', 'बदतमीज दिल' यांसारखी गाणी आजही चाहत्यांच्या पसंतीस उतरतात.
दरम्यान, आगामी कॉटकेल २ (Cocktail 2) चित्रपटातील गाण्यांनाही प्रीतम यांनी संगीत दिले असून हा चित्रपट १९ जून रोजी प्रदर्शित होणार आहे. त्यांच्या पोस्टवर चाहते आणि सेलिब्रिटींकडून शुभेच्छांचा वर्षाव होत असून, अनेकांनी त्यांना नव्या प्रवासासाठी शुभेच्छा दिल्या आहेत.