मुंबई : प्रधानमंत्री मत्स्यसंपदा योजनेअंतर्गत रायगड जिल्ह्यातील महाड शहरात आधुनिक मच्छी मार्केट इमारत उभारण्यासाठी सर्वसमावेशक आणि परिपूर्ण प्रस्ताव तयार करून तो १५ दिवसांच्या आत शासनाकडे सादर करावा, असे निर्देश मत्स्यव्यवसाय व बंदरे मंत्री नितेश राणे यांनी संबंधित अधिकाऱ्यांना दिले. प्रस्ताव प्राप्त होताच आवश्यक प्रशासकीय कार्यवाही तत्काळ पूर्ण करण्यात येईल, असेही त्यांनी स्पष्ट केले. Nitesh Rane
प्रधानमंत्री मत्स्यसंपदा योजनेअंतर्गत महाड येथे मच्छी मार्केट उभारणीसाठी निधी उपलब्ध करून देण्यासंदर्भात मंत्रालयात मंत्री नितेश राणे यांच्या अध्यक्षतेखाली आढावा बैठक आयोजित करण्यात आली होती. यावेळी प्रकल्पाच्या विविध बाबींचा सविस्तर आढावा घेण्यात आला.
महाड नगरपरिषदेकडून मच्छी मार्केट उभारणीसाठी करण्यात आलेल्या प्राथमिक कामांचा आढावा घेताना मंत्री राणे यांनी हा प्रकल्प स्थानिक मत्स्यव्यवसायाला चालना देणारा ठरणार असल्याचे सांगितले. या प्रकल्पामुळे मच्छी विक्रेते, मत्स्यव्यावसायिक आणि ग्राहकांना आधुनिक, स्वच्छ व सुसज्ज सुविधा उपलब्ध होतील. तसेच मत्स्य उत्पादनांच्या विक्रीसाठी अधिक सक्षम व नियोजनबद्ध व्यवस्था निर्माण होईल, असे त्यांनी नमूद केले.
बैठकीस आमदार प्रवीण दरेकर, मत्स्यव्यवसाय आयुक्त पी. प्रदीप, महाराष्ट्र मत्स्यव्यवसाय विकास महामंडळाचे व्यवस्थापकीय संचालक प्रकाश खपले तसेच महाड नगरपरिषदेचे मुख्याधिकारी दूरदृश्य प्रणालीद्वारे उपस्थित होते.