- डॉक्टरांनी महत्वाची बातमी
Fairness Cream : गोरं दिसण्याच्या हव्यासापोटी फेयरनेस क्रीमचा सर्रास वापर करणाऱ्यांसाठी धक्कादायक माहिती समोर आली आहे. त्वचा गोरी करण्याचा दावा करणाऱ्या अनेक फेयरनेस क्रीम्समुळे किडनी निकामी होण्याच्या घटनांमध्ये चिंताजनक वाढ होत असल्याचा इशारा डॉक्टरांनी दिला आहे. अशा क्रीमचा वापर केल्यानंतर अनेक तरुणांना गंभीर किडनीच्या आजारामुळे रुग्णालयात दाखल करावे लागल्याचे समोर आले आहे. (Fairness Cream)
फेयरनेस क्रीममुळे किडनी कशी खराब होते?
तज्ज्ञांच्या मते, अनेक अनधिकृत आणि बनावट फेयरनेस क्रीम्समध्ये त्वचा तात्पुरती गोरी दिसावी म्हणून 'पारा' (Mercury) हा अत्यंत विषारी धातू मिसळला जातो. हा पारा त्वचेद्वारे शरीरात शोषला जातो आणि रक्तातून थेट किडनीपर्यंत पोहोचतो. त्यामुळे किडनीची गाळण्याची क्षमता कमी होते आणि ग्लोमेरुलोनेफ्रायटिस (Glomerulonephritis) सारखे गंभीर आजार होऊन किडनी निकामी होण्याचा धोका वाढतो. (Fairness Cream)
विशेष म्हणजे, काही बेकायदेशीररीत्या विकल्या जाणाऱ्या किंवा परदेशातून तस्करीने आणल्या जाणाऱ्या फेयरनेस क्रीम्समध्ये पाऱ्याचे प्रमाण सुरक्षित मर्यादेपेक्षा हजारो पटीने अधिक असल्याचेही तज्ज्ञांनी नमूद केले आहे. (Fairness Cream)
'ही' लक्षणे दिसल्यास डॉक्टरांचा सल्ला घ्या :
- लघवीचे प्रमाण अचानक कमी होणे किंवा लघवीत फेस येणे.
- पाय, चेहरा आणि डोळ्यांभोवती सूज येणे.
- सतत थकवा जाणवणे आणि भूक मंदावणे.
- त्वचेला तीव्र खाज सुटणे.
अशी लक्षणे दिसल्यास लगेच त्वचारोग तज्ज्ञांचा सल्ला घेणे आवश्यक असल्याचे डॉक्टरांनी सांगितले आहे. (Fairness Cream)
क्रीम लावण्यापूर्वी डॉक्टरांचा सल्ला आवश्यक :
तज्ज्ञांनी नागरिकांना कोणतीही फेयरनेस किंवा त्वचा उजळवणारी क्रीम डॉक्टरांच्या सल्ल्याशिवाय वापरू नये, असे आवाहन केले आहे. क्रीम खरेदी करताना त्यावरील घटकांची यादी काळजीपूर्वक तपासावी. त्यामध्ये Mercury, Mercurous Chloride किंवा Mercuric असे घटक असल्यास ती क्रीम वापरणे टाळावे.
तसेच, सोशल मीडियावरील जाहिराती, ब्युटीशियनचे सल्ले किंवा 'काही दिवसांत गोरेपणा' देण्याचा दावा करणाऱ्या अनधिकृत उत्पादनांपासून दूर राहण्याचेही डॉक्टरांनी नागरिकांना आवाहन केले आहे. (Fairness Cream)
टीप :- (वरील माहिती डॉक्टरांच्या सल्ल्यानुसार देण्यात आली आहे.)