पुणे : पुण्यातील (Pune) उद्योगपती केतन अग्रवाल हत्या (Ketan Agarwal Murder) प्रकरणात तपासादरम्यान आणखी एक महत्त्वाचा मुद्दा समोर आला आहे. या प्रकरणातील आरोपी सिया गोयल (Siya Goyal) आणि चेतन चौधरी (Chetan Chaudhary) यांना न्यायालयात हजर करण्यात आले असता, पोलिसांनी चेतनच्या पँटचा उल्लेख केला. त्यानंतर या पुराव्याबाबत नव्याने चर्चा सुरू झाली आहे.
या प्रकरणाचा पुढील तपास करण्यासाठी पोलिसांनी दोन्ही आरोपींची ७ दिवसांची पोलीस कोठडी मागितली होती. मात्र, न्यायालयाने सिया गोयल आणि चेतन चौधरी यांना ४ दिवसांची पोलीस कोठडी सुनावली.
सरकारी पक्षाने न्यायालयात सांगितले की, तपासासाठी काही महत्त्वाचे पुरावे अद्याप जप्त करायचे आहेत. त्यामध्ये चेतन चौधरीची पँटही महत्त्वाची असल्याचे पोलिसांनी नमूद केले. या कपड्यांमधून तपासासाठी आवश्यक पुरावे मिळण्याची शक्यता असल्याचा पोलिसांचा दावा आहे.
चेतनच्या वकिलांचा विरोध
दुसरीकडे, चेतन चौधरीच्या वकिलांनी पोलिसांच्या मागणीला विरोध केला. हुडी, मोबाईल आणि वाहन यांसारख्या वस्तू आधीच जप्त करण्यात आल्या असताना पँट त्याचवेळी का जप्त करण्यात आली नाही, असा सवाल त्यांनी न्यायालयात उपस्थित केला. पोलिसांनी मागणी केली असती तर संबंधित कपडेही तपासासाठी उपलब्ध करून दिले असते, असा दावाही बचाव पक्षाने केला.
बचाव पक्षाने युक्तिवाद करताना घटनास्थळी सीन रिक्रिएशन पूर्ण झाले असून अनेक पंचनामेही झाले आहेत. त्यामुळे पुन्हा दीर्घ पोलीस कोठडीची गरज नसल्याचे न्यायालयाच्या निदर्शनास आणून दिले.
दरम्यान, केतन अग्रवाल हत्या प्रकरणाचा तपास सुरू असून पोलिसांकडून सर्व पुराव्यांची पडताळणी केली जात आहे. कपडे, डिजिटल पुरावे आणि फॉरेन्सिक अहवालाच्या आधारे पुढील तपास केला जाणार असल्याची माहिती समोर येत आहे.