महापालिका अतिरिक्त आयुक्त प्राजक्ता लवंगारे यांचे निर्देश
मुंबई (विशेष प्रतिनिधी) : उपनगरीय रूग्णालयात आरोग्य क्षेत्रात काम करणारी यंत्रणा तसेच नागरिक यांच्यादृष्टीने सोयीची अशी तंत्रज्ञानस्नेही पुढाकार घेण्याचे निर्देशही त्यांनी यावेळी दिले. दैनंदिन हजेरी, रुग्ण नोंदणी, आरोग्य सुविधा, औषध उपलब्धतता अशा विविध क्षेत्रात कृत्रिम बुद्धिमत्तेचा आधार घेऊन दैनंदिन काम सोपे करणे शक्य आहे. तंत्रज्ञानाच्या वापरामुळे आरोग्य क्षेत्रातील कामगिरीचे मूल्यांकन करणेही शक्य होईल. त्यामुळे रूग्णालय प्रशासनाने अशा तंत्रज्ञानस्नेही पुढाकाराचा अवलंब करावा, असे निर्देश महापालिका अतिरिक्त आयुक्त (शहर) प्राजक्ता लवंगारे यांनी दिले.
अतिरिक्त महानगरपालिका आयुक्त (शहर) श्रीमती प्राजक्ता लवंगारे यांनी वांद्रे (पश्चिम) स्थित खुरशादजी बेहरामजी भाभा महानगरपालिका सर्वसाधारण रुग्णालय येथे बुधवारी १ जुलै २०२६ सायंकाळी आकस्मिक भेट देऊन पाहणी केली. उपनगरीय रुग्णालयाच्या ठिकाणी हॉस्पिटल मॅनेजमेंट इन्फॉर्मेशन सिस्टिम या प्रणालीची अंमलबजावणीचा वेग वाढवण्याचे निर्देश त्यांनी दिले. तसेच तंत्रज्ञानाचा आधार घेतानाच कृत्रिम बुद्धिमत्तेवर आधारित कामगिरीचे मूल्यांकन करण्याच्या अनुषंगाने पावले उचलण्याच्या सूचनाही त्यांनी केल्या. या भेटीदरम्यान प्राजक्ता लवंगारे यांनी पुरूष, महिला कक्ष, नवजात शिशू कक्ष आदी विभागांची आणि प्रसाधनगृहांची प्रत्यक्ष पाहणी केली. एचएमआयएस संगणकीय प्रणाली, औषधसाठा, रुग्णांची स्थिती, उपचार पद्धती आदींची माहिती जाणून घेतली. तसेच, उपनगरीय रुग्णालयाच्या कामगिरीचा तसेच क्षमतावाढीच्या अनुषंगाने सुरू असलेल्या पुनर्विकास कामांचा आढावा घेतला. प्रमुख वैद्यकीय अधीक्षक चंद्रकांत पवार यांच्यासह संबंधित अधिकारी यावेळी उपस्थित होते.
नागरिकांसाठी सुलभ अशी एचएमआयएस प्रणाली उपनगरीय रूग्णालयात उपलब्ध करून देण्याच्या अनुषंगाने आढावा त्यांनी या बैठकीच्या दरम्यान घेतला. या प्रणालीची अंमलबजावणी लवकरात लवकर कशा पद्धतीने करणे शक्य होईल, त्याअनुषंगाने आवश्यक पावले उचलण्याचे निर्देश त्यांनी दिले. उपनगरीय रूग्णालयांमध्ये खुरशादजजी बेहरामजी भाभा महानगरपालिका सर्वसाधारण रूग्णालय, सिद्धार्थ महानगरपालिका सर्वसाधारण रूग्णालय, भारतरत्न डॉ. बाबासाहेब आंबेडकर महानगरपालिका सर्वसाधारण रूग्णालय, पंडित मदनमोहन मालविय महानगरपालिका शताब्दी रूग्णालय (गोवंडी) याठिकाणी आरोग्य सेवा आणि पुनर्विकास कामांचा आढावादेखील यावेळी घेण्यात आला. रूग्णालय पायाभूत सुविधा कक्षाचे अधिकारीही यावेळी उपस्थित होते. रुग्णालयाच्या पुनर्विकास कामांच्या ठिकाणी येणारे अडथळे, पुनर्विकासाचे टप्पे, मनुष्यबळ नेमणूक यासारख्या बाबींचा प्राजक्ता लवंगारे यांनी आढावा घेतला. तसेच विविध टप्प्यात सुरू असणारी पुनर्विकासाची कामे नियोजित वेळेत पूर्ण करण्याचे निर्देशही त्यांनी यावेळी दिले.