Weather Update : गेल्या दोन दिवसांपासून मुंबई (Mumbai), उपनगरे, ठाणे, नवी मुंबई आणि कोकण परिसरात मुसळधार पावसाने जोरदार हजेरी लावली आहे. अनेक ठिकाणी जोरदार वाऱ्यासह पाऊस सुरू असल्याने रस्ते आणि रेल्वे वाहतुकीवर परिणाम झाला असून लोकल सेवा काही प्रमाणात धीम्या गतीने सुरू आहे. मात्र राज्याच्या इतर भागांमध्ये पावसाचे चित्र वेगळे असून काही जिल्ह्यांमध्ये अद्यापही समाधानकारक पाऊस झालेला नाही.
हवामान विभागाने आज सकाळी (IMD) वर्तवलेल्या अंदाजानुसार, पुढील 3 तास मुंबई, ठाणे, रायगड, नाशिक आणि पुणे (Pune) जिल्ह्यांतील काही ठिकाणी मध्यम ते मुसळधार पावसाची शक्यता आहे. या पार्श्वभूमीवर संबंधित जिल्ह्यांसाठी ऑरेंज वॉर्निंग देण्यात आली असून नागरिकांनी आवश्यक ती खबरदारी घेण्याचे आवाहन करण्यात आले आहे. (Orange Alert)
हवामान तज्ज्ञांच्या माहितीनुसार, देशाच्या विविध भागांत तयार झालेली सायक्लोनिक सर्क्युलेशन प्रणाली तसेच पाकिस्तानच्या दिशेने असलेल्या वेस्टर्न डिस्टर्बन्समुळे वातावरणात बदल झाला आहे. अरबी समुद्र आणि इतर भागांतून येणाऱ्या ओलाव्यामुळे कोकण, पश्चिम महाराष्ट्र आणि विशेषतः पुण्याच्या घाटमाथ्यावर पावसाचा जोर वाढला आहे. घाटमाथा परिसरासाठी रेड अलर्ट कायम ठेवण्यात आला आहे.
मागील 24 तासांत माथेरान, ठाणे (Thane) तसेच कोकण (Kokan) आणि गोवा परिसरात चांगल्या पावसाची नोंद झाली आहे. दुसरीकडे मराठवाडा आणि विदर्भातील अनेक भागांमध्ये अजूनही अपेक्षित पाऊस झालेला नाही. त्यामुळे खरीप पिकांबाबत शेतकऱ्यांची चिंता कायम आहे. (Weather Update)
हवामान तज्ज्ञांच्या अंदाजानुसार, आज कोकण आणि पश्चिम महाराष्ट्रात ताशी सुमारे 60 किमी वेगाने वारे वाहण्याची शक्यता असून काही ठिकाणी मुसळधार पाऊस पडू शकतो. त्यामुळे सखल भागातील नागरिकांनी सतर्क राहावे, अनावश्यक प्रवास टाळावा आणि प्रशासनाच्या सूचनांचे पालन करावे, असे आवाहन करण्यात आले आहे. (Thane Rain)
यंदाच्या मान्सून हंगामात राज्यात अद्यापही सरासरीपेक्षा सुमारे 21 टक्के पावसाची तूट असल्याचे निरीक्षण आहे. विदर्भ आणि मराठवाड्यात पुढील काही दिवसांत पावसाची शक्यता असली तरी या भागांना अजूनही जोरदार सरींची प्रतीक्षा आहे. (Monsoon Update)