Nashik : नाशिककरांनो, उद्याच्या पाणीपुरवठ्याबाबत महत्त्वाची बातमी आहे. सातपूर परिसरातील मुख्य गुरुत्ववाहीनीला मोठी गळती लागल्याने मनपाला तातडीने दुरुस्तीचे काम हाती घ्यावे लागले आहे. त्यामुळे सातपूर आणि नाशिक पश्चिम भागातील अनेक परिसरांचा उद्याचा पाणीपुरवठा पूर्णपणे बंद राहणार असून, त्यानंतरच्या दिवशीही कमी दाबाने पाणी मिळणार आहे.
मुख्य गुरुत्ववाहीनीला गळती
सातपूर विभागीय कार्यालयासमोरील जलकुंभांना पाणीपुरवठा करणाऱ्या मुख्य गुरुत्ववाहीनीला अचानक मोठ्या प्रमाणात गळती सुरू झाली आहे. या बिघाडामुळे सातपुर व नाशिक पश्चिम विभागातील दादासाहेब गायकवाड जलकुंभ, स्त्री मंडळ जलकुंभ, लव्हाटे नगर जलकुंभ, महात्मानगर जलकुंभ भरता आलेले नाही. मनपाने तातडीने दुरुस्तीचे काम सुरू केले असले तरी हे काम मोठ्या स्वरूपाचे असल्याने बुधवार, २९ जुलै रोजी सातपूर विभागातील सकाळचा आणि नाशिक पश्चिम विभागातील दुपारचा पाणीपुरवठा पूर्णपणे बंद राहणार आहे. (Water supply shut off)
गुरुवार सकाळी पाणीपुरवठा कमी दाबाने
यामध्ये दादासाहेब गायकवाड जलकुंभ परिसर, स्वारबाबा नगर, सातपूर गाव, राजवाडा, कांबळेवाडी, गौतम नगर, महादेव नगर, जीपी नगर, जगतापवाडी तसेच पश्चिम विभागातील स्त्रीमंडळ, लव्हाटे नगर, महात्मानगर जलकुंभ परिसर, कामगार नगर, सुयोजित लॉन्स, परीजात नगर, महात्मानगर आदी भागांचा समावेश आहे. याशिवाय गुरुवार, ३० जुलै रोजी सकाळचाही पाणीपुरवठा कमी दाबाने होणार असल्याचे मनपाने स्पष्ट केले आहे.