Nashik Crime : बांगलादेशातून अवैध मार्गाने भारतात प्रवेश करून नाशिकमार्गे पुण्याला जाण्याच्या तयारीत असलेल्या दोन बांगलादेशी नागरिकांना गुन्हे शाखा युनिट-२ने नाशिकरोड बसस्थानक परिसरातून जेरबंद केले. मोहम्मद साकीब मुल्ला (वय २२) आणि नाहीदा बादशाह मुल्ला (वय २१) अशी त्यांची नावे आहेत. (Nashik Crime News)
दोन बांगलादेशी नागरिकांना अटक
बेकायदेशीररीत्या वास्तव्य करणाऱ्या परदेशी नागरिकांचा शोध घेऊन कठोर कारवाई करण्याच्या सूचना पोलीस आयुक्त संदीप कर्णिक, पोलीस उप आयुक्त किरणकुमार चव्हाण, सहा. पोलीस आयुक्त, संदीप मिटके नाशिक शहर यांनी गुन्हे शाखेला दिल्या होत्या. त्या अनुषंगाने गुन्हे शाखा युनिट-२ (Crime Branch Unit-2) चे पोलीस अधिकारी व अंमलदार अवैधरीत्या वास्तव्य करणाऱ्या परदेशी नागरिकांची माहिती घेत असताना पो. हवलदार प्रदीप नन्नावरे व पो. अंमलदार संतोष सुपेकर यांना गुप्त माहिती मिळाली.
त्यानुसार सहायक पोलीस निरीक्षक हेमंत तोडकर (प्रभारी अधिकारी) यांच्या मार्गदर्शनाखाली पथकाने नाशिकरोड बसस्थानकातील पोलीस चौकीजवळ सापळा रचला. यावेळी मोहम्मद साकीब मुल्ला, रा. खुलता, जि. नराईल, राज्य खुलना, बांगलादेश आणि नाहीदा बादशाह मुल्ला, रा. सगोलसिरा, जि. नराईल, राज्य खुलना, बांगलादेश हे दोघे आढळून आले. चौकशीत त्यांच्याकडे कोणतीही वैध प्रवासी कागदपत्रे नसल्याचे समोर आले. तसेच त्यांनी भारत-बांगलादेश सीमेवरून अधिकृत परवानगीशिवाय अवैध मार्गाने भारतात प्रवेश केल्याचे सांगितल्याचे पोलिसांनी नमूद केले आहे. (Nashik Crime News)
नाशिकरोड पोलीस ठाण्यात गुन्हा दाखल
याप्रकरणी पोलीस अंमलदार संतोष सुपेकर यांनी सरकारतर्फे फिर्याद दिल्याने नाशिकरोड पोलीस ठाण्यात (Nashik Road Police Station) गुन्हा दाखल करण्यात आला आहे. पुढील तपास नाशिकरोड पोलीस स्टेशनचे (Nashik Road Police Station) उपनिरीक्षक आहेर करीत आहेत.ही कारवाई वरिष्ठ पोलीस निरीक्षक जगवेंद्रसिंग राजपूत, सहायक पोलीस निरीक्षक प्रदीप गिरी, हेमंत तोडकर (प्रभारी अधिकारी), श्रेणी उप निरीक्षक मुक्तारखान पठाण, सहायक पोलीस उपनिरीक्षक गुलाब सोनार, पोलीस हवलदार प्रदीप नन्नावरे, पो.अंमलदार संतोष सुपेकर, मनोज शिंदे, प्रविण वानखेडे, जितेंद्र वजीरे तसेच नाशिकरोड दामिनी पथकाच्या सोनाली बागुल व ज्योती पवार यांनी केली.