पुणे : पुण्यातील कोंढवा (Kondawa) परिसरात स्वतःला अध्यात्मिक गुरु सांगणाऱ्या एका तरुणाने नकारात्मक ऊर्जा काढून टाकण्याच्या नावाखाली 22 वर्षीय तरुणीची फसवणूक केल्याचा प्रकार समोर आला आहे. या प्रकरणी कोंढवा पोलिसांनी दिव्य जितेंद्र परमार (वय 23, रा. पार्श्वनगर सोसायटी, कोंढवा बुद्रुक) याला अटक केली आहे. त्याच्याविरोधात विनयभंग तसेच जादूटोणा प्रतिबंधक कायद्यानुसार गुन्हा दाखल करण्यात आला आहे. न्यायालयाने आरोपीला दोन दिवसांची पोलीस कोठडी सुनावली आहे. (Pune Crime)
पोलिसांच्या माहितीनुसार, आरोपी परिसरातील महिला आणि तरुणींना व्यायामासंदर्भात विविध टिप्स देत होता. याच माध्यमातून 22 वर्षीय तरुणीची त्याच्याशी ओळख झाली. काही काळ संपर्कात राहिल्यानंतर आरोपीने तरुणीच्या शरीरात नकारात्मक ऊर्जा असल्याचा दावा केला. ही ऊर्जा बाहेर काढण्यासाठी काही विशिष्ट शारीरिक हालचाली करणे गरजेचे असल्याचे त्याने तिला सांगितले. (Kondhwa Police)
यानंतर आरोपीने तरुणीला वेगवेगळ्या प्रकारे घाबरवण्यास सुरुवात केली. नकारात्मक ऊर्जा काढण्याच्या बहाण्याने त्याने तिच्याकडे अर्धनग्न फोटो पाठवण्याची मागणी केली. त्याच्या बोलण्यावर विश्वास ठेवून आणि भीतीपोटी तरुणीने त्याला मोबाईलवरून फोटो पाठवले. (Pune News)
मात्र, काही काळानंतर तरुणीला आरोपीच्या वागण्याचा संशय आला. आपली फसवणूक झाल्याचे लक्षात आल्यानंतर तिने कोंढवा पोलीस ठाण्यात तक्रार दाखल केली. तक्रारीची दखल घेत पोलिसांनी आरोपीविरोधात गुन्हा दाखल करून त्याला अटक केली. (Crime)
या प्रकरणाचा पुढील तपास कोंढवा पोलीस करत आहेत. आरोपीने अशाच प्रकारे इतर महिला किंवा तरुणींना आपल्या जाळ्यात ओढले आहे का, याचाही तपास पोलिसांकडून केला जात आहे. अशा प्रकारे अंधश्रद्धेच्या नावाखाली कोणी वैयक्तिक फोटो किंवा अन्य माहिती मागत असल्यास नागरिकांनी सावध राहून तातडीने पोलिसांशी संपर्क साधण्याचे आवाहन करण्यात आले आहे. (Pune)