Nashik Crime : नाशिकमध्ये मॅट्रिमोनिअल ॲपच्या माध्यमातून डॉक्टरची तब्बल ११ लाख ८६ हजार रुपयांची फसवणूक केल्याचा धक्कादायक प्रकार समोर आला आहे. डॉ. सायली पाटील या नावाने बनावट प्रोफाइल तयार करून एका नामांकित डॉक्टरला जाळ्यात ओढणारा संशयित संकेत चव्हाण हा २५ वर्षीय तृतीयपंथी असल्याचे पोलिसांच्या तपासात समोर आले आहे.
नेमकं प्रकरण काय ?
लग्नासाठी मॅट्रिमोनिअल ॲपवर नोंदणी केलेल्या डॉक्टरची ‘डॉ. सायली पाटील’ या नावाच्या प्रोफाइलशी ओळख झाली. संशयित संकेत चव्हाण हा AI व्हॉईस चेंजरच्या मदतीने महिलेचा हुबेहूब आवाज तयार करून डॉक्टरशी संवाद साधत होता. त्यासोबतच तरुणीचे आकर्षक फोटो पाठवून त्यांचा विश्वास संपादन करण्यात आला. नाशिकमधील तीन ते चार नामांकित डॉक्टर आपले नातेवाईक असल्याचे सांगत संशयिताने डॉक्टर आणि त्यांच्या कुटुंबाचा विश्वास आणखी दृढ केला. प्रत्यक्ष भेट मात्र सातत्याने टाळण्यात आली आणि मोबाईलवरूनच लग्नाची बोलणी सुरू ठेवण्यात आली. (Nashik Crime News)
अंबड पोलिस ठाण्यात तक्रार
१३ जून ते २२ ऑगस्टदरम्यान लग्नाची तयारी, कपडे, दागिने तसेच तातडीच्या आर्थिक गरजा अशी वेगवेगळी कारणे सांगून डॉक्टरकडून ऑनलाइन पैसे उकळण्यात आले. एवढेच नाही तर एटीएम कार्डही हस्तगत करण्यात आले. अशा प्रकारे डॉक्टरची तब्बल ११ लाख ८६ हजार रुपयांची फसवणूक करण्यात आली. फसवणूक झाल्याचे लक्षात आल्यानंतर डॉक्टरने अंबड पोलिस ठाण्यात तक्रार दाखल केली. पोलिसांनी सुरुवातीला डॉ. सायली पाटील, तिचा कथित भाऊ लोकेश, सेवानिवृत्त काका आणि मनमत देसले अशा चार संशयितांविरोधात गुन्हा दाखल केला. (Nashik Crime News)
सॅनिटायझर पिऊन पोलिसांवर दबाव
वरिष्ठ पोलिस निरीक्षक जयंत शिरसाठ यांच्या मार्गदर्शनाखाली पोलिस निरीक्षक अविनाश नडविनकेरी यांच्या पथकाने तांत्रिक तपास आणि CDRच्या आधारे या प्रकरणाचा छडा लावला. तपासात ‘डॉ. सायली पाटील’ या नावामागे संकेत चव्हाण असल्याचे समोर आले आणि त्याला अटक करण्यात आली. पोलिसांनी ताब्यात घेतल्यानंतरही संकेतने आजारपणाचा बनाव करत पोलिसांवर दबाव आणण्याचा प्रयत्न केल्याचे समोर आले. त्याने सॅनिटायझर पिण्याचाही प्रयत्न केला. मात्र, वैद्यकीय तपासणीनंतर पोलिसांनी त्याला रीतसर अटक केली. संशयिताने याच पद्धतीने आणखी किती जणांना जाळ्यात ओढले आहे, या फसवणुकीत आणखी कोणाचा सहभाग आहे आणि उकळलेली ११ लाख ८६ हजार रुपयांची रक्कम कुठे वापरली, याचा तपास अंबड पोलिसांकडून सुरू आहे. (Nashik Crime News)