मुंबई : अभिनेत्री श्वेता तिवारीने ऑनलाइन महिलांविरोधात आक्षेपार्ह आणि अपमानजनक टिप्पणी करणाऱ्या काही सोशल मीडिया वापरकर्त्यांबाबत मनसे प्रमुख राज ठाकरे यांना प्रश्न विचारल्यानंतर घडलेल्या घटनांबाबत स्पष्टीकरण दिले आहे. संबंधित व्यक्ती मनसेचे सदस्य नसल्याचे पक्षाशी संबंधित एका वकिलाने आपल्याला स्पष्ट केल्याचे श्वेताने सांगितले.
काही दिवसांपूर्वी श्वेताने महिलांविरोधात आक्षेपार्ह भाषा वापरणाऱ्या काही सोशल मीडिया अकाउंट्सचे स्क्रीनशॉट शेअर केले होते. यातील काही जण मनसे समर्थक असल्याचा दावा करत असल्याचे सांगत, अशा वर्तनाला पक्षाचा पाठिंबा आहे का, असा सवाल तिने राज ठाकरे यांच्याकडे केला होता. यानंतर मनसे समितीशी संबंधित एका वकिलाने श्वेताशी संपर्क साधला. संबंधित व्यक्ती पक्षाची सदस्य नसल्याचे तसेच महिलांविरोधातील अशा प्रकारच्या वर्तनाला पक्ष समर्थन देत नसल्याचे त्यांच्याकडून स्पष्ट करण्यात आल्याचे श्वेता तिवारीने सांगितले.
श्वेताच्या म्हणण्यानुसार, या व्यक्तीचा शोध घेण्यासाठी काही दिवसांची मुदत मागण्यात आली होती. मात्र, अवघ्या तीन दिवसांत संबंधित व्यक्तीचा फोन नंबर आणि त्याने स्वतःच्या हस्ताक्षरात लिहिलेले माफीपत्र त्यांना पाठवण्यात आले. श्वेताने या माफीपत्राचा स्क्रीनशॉटही इन्स्टाग्राम स्टोरीवर शेअर केला. या प्रकरणाचा पाठपुरावा केल्याबद्दल श्वेताने मनसे टीमचे आभार मानले. महिलांचा अपमान करणाऱ्या वर्तनाला गांभीर्याने घेतल्याचेही श्वेताने नमूद केले.
‘ऑनलाइन छळाची समस्या एका व्यक्तीपुरती मर्यादित नाही’
दरम्यान, या घटनेनंतर श्वेताने ऑनलाइन ट्रोलिंग आणि महिलांच्या छळाच्या व्यापक समस्येवरही चिंता व्यक्त केली. सोशल मीडिया आणि स्क्रीनमागे लपून कोणत्याही परिणामांची भीती न बाळगता महिलांवर आक्षेपार्ह टिप्पणी करणाऱ्यांची संख्या मोठी असल्याचे तिने म्हटले. ही समस्या केवळ एका व्यक्ती किंवा एका घटनेपुरती मर्यादित नसून, 'महिलांचा ऑनलाइन छळ करण्याला कोणताही परिणाम भोगावा लागणार नाही', अशी मानसिकता बदलण्याची गरज असल्याचे श्वेताने सांगितले. तंत्रज्ञान कंपन्या आणि सोशल मीडिया प्लॅटफॉर्म्सनी ऑनलाइन छळ, विशेषतः महिलांविरोधातील गैरवर्तन रोखण्यासाठी प्रभावी उपाययोजना करण्याची गरज असल्याचेही श्वेता तिवारीने अधोरेखित केले.