मुंबई : मुंबई इंडियन्सच्या निळ्या-गोल्डन रंगांनी सजलेलं Malaysia Airlinesचं खास Airbus A330-300 विमान बुधवारी, २६ ऑगस्ट रोजी मुंबईत प्रथमच दाखल झालं. 9M-MTM या नोंदणी क्रमांकाचं हे विशेष विमान क्वालालंपूरहून MH-194 या विमानसेवेने छत्रपती शिवाजी महाराज आंतरराष्ट्रीय विमानतळावर उतरलं. विमानाच्या आगमनाने विमानप्रेमी आणि क्रिकेट चाहत्यांचं लक्ष वेधून घेतलं. मुंबईत उतरताना विमानावरची खास रंगसंगती स्पष्टपणे दिसत होती. Malaysia Airlinesच्या पारंपरिक निळ्या रंगासोबत मुंबई इंडियन्सचे प्रसिद्ध निळे आणि सोनेरी रंग, संघाचा लोगो आणि गतिमान ‘चक्र’ डिझाइन विमानावर साकारण्यात आलं आहे. त्यामुळे हे विमान आकाशात दिसताच मुंबई इंडियन्सच्या चाहत्यांसाठी तो आकर्षणाचा विषय ठरत आहे.
Malaysia Airlines आणि Mumbai Indians यांनी एप्रिल २०२६मध्ये या विशेष विमानाच्या लिव्हरीचं अनावरण केलं होतं. कंपनीच्या मते, या डिझाइनमधून क्रिकेट, संस्कृती आणि जागतिक कनेक्टिव्हिटी यांचा संगम दाखवण्याचा प्रयत्न करण्यात आला आहे. विमानावरील मुंबई इंडियन्सच्या चिन्हाभोवती दिसणारी गतिमान रचना संघाची ऊर्जा, गती आणि वाढता जागतिक चाहता वर्ग दर्शवते. विशेष म्हणजे, 9M-MTM हे Airbus A330-323 विमान आहे आणि Malaysia Airlinesच्याच ताफ्यात कार्यरत आहे. विमानाच्या फ्लाइट हिस्ट्रीनुसार, २६ ऑगस्ट रोजी त्याने MH-194 म्हणून क्वालालंपूर-मुंबई मार्गावर सेवा दिली. त्यानंतर याच विमानाने MH-195 म्हणून मुंबईहून क्वालालंपूरला परतीचा प्रवास केला.
या विशेष विमानाच्या माध्यमातून Malaysia Airlines आणि Mumbai Indians यांच्यातील भागीदारीला आणखी मोठं व्यासपीठ मिळालं आहे. विमान कंपनीने भारताला आपल्या महत्त्वाच्या बाजारपेठांपैकी एक मानलं असून, मुंबईसह भारतातील प्रमुख शहरांना क्वालालंपूरशी जोडण्यावर भर दिला आहे. मुंबई-क्वालालंपूर मार्गावर अशा मोठ्या वाइड-बॉडी विमानाची सेवा आणि त्यावर मुंबई इंडियन्सची आकर्षक ब्रँडिंग यामुळे दोन्ही ब्रँडचा संदेश भारताबाहेरही पोहोचणार आहे.
दरम्यान, हे विमान केवळ मुंबईपुरतं मर्यादित राहणार नसून Malaysia Airlinesच्या नेटवर्कनुसार विविध आंतरराष्ट्रीय मार्गांवरही सेवा देऊ शकतं. त्यामुळे आगामी काळात मुंबई इंडियन्सच्या रंगात रंगलेलं हे विमान भारतासह आशिया-पॅसिफिकच्या आकाशातही दिसण्याची शक्यता आहे. एका बाजूला क्रिकेटचा ग्लोबल ब्रँड आणि दुसऱ्या बाजूला आंतरराष्ट्रीय विमान कंपनी—या दोघांच्या भागीदारीतून तयार झालेलं हे विमान आता मुंबईच्या आकाशात आणि विमानतळावरचं नवं आकर्षण ठरलं आहे.