Nisha Bhagat Fraud Case : प्रसिद्ध मराठी लोकगायिकेविरोधात गुन्हा दाखल; सरकारी नोकरीच्या आमिषाने लाखोंची फसवणूक केल्याचा आरोप

कल्याण : प्रसिद्ध मराठी लोकगायिका निशा भगत आणि अनिल आहिरे यांच्याविरोधात सरकारी नोकरीच्या आमिषाने २० लाख रुपये घेतल्याच्या आरोपावरून गुन्हा दाखल करण्यात आला आहे. उल्हासनगर सेंट्रल हॉस्पिटलमध्ये पतीला सरकारी नोकरी लावून देण्याचे आश्वासन देत पैसे घेतल्याचा आरोप कल्याणमधील सायली चव्हाण यांनी केला आहे. त्यांच्या तक्रारीनंतर विठ्ठलवाडी पोलीस ठाण्यात गुन्हा दाखल करण्यात आला आहे. (Nisha Bhagat Fraud Case)

घरगुती ओळखीचा फायदा घेतल्याचा आरोप :

सायली चव्हाण यांच्या तक्रारीनुसार, त्यांचे आई-वडील गायक आणि कलाकार असल्याने निशा भगत आणि अनिल आहिरे यांचे त्यांच्या कुटुंबासोबत पूर्वीपासून परिचयाचे संबंध होते. विविध कार्यक्रमांच्या निमित्ताने दोघांचे चव्हाण कुटुंबीयांकडे येणे-जाणे होते. या ओळखीचा फायदा घेत आरोपींनी कुटुंबाचा विश्वास संपादन केल्याचा आरोप चव्हाण यांनी केला आहे. तसेच, सरकारी विभागांमध्ये आपली ओळख असल्याचे सांगून नोकरी लावून देण्याचे आश्वासन दिल्याचे तक्रारीत नमूद करण्यात आले आहे. (Nisha Bhagat Fraud Case)

२० लाख रुपये घेतल्याचा आरोप :

मार्च ते सप्टेंबर २०२३ या कालावधीत सरकारी नोकरी मिळवून देण्याच्या नावाखाली कथितरित्या २० लाख रुपये घेतल्याचा आरोप करण्यात आला आहे. मात्र, पैसे दिल्यानंतरही आश्वासन दिलेली नोकरी मिळाली नाही. त्यानंतर रक्कम परत मागितली असता पैसे परत करण्यास नकार दिल्याचा आरोप तक्रारदार महिलेने केला आहे. (Nisha Bhagat Fraud Case)

चव्हाण यांच्या म्हणण्यानुसार, या व्यवहारासंदर्भातील पैशांच्या देवाणघेवाणीचे पुरावे आणि व्हिडीओ त्यांच्याकडे आहेत. सेंट्रल हॉस्पिटलमध्ये दोन पदे रिक्त असल्याचे सांगून पैसे दिल्यास त्या पदांवर नोकरी लावून देण्याचा दावा करण्यात आल्याचेही तक्रारीत नमूद आहे. (Nisha Bhagat Fraud Case)

पोलिसांकडून तपास सुरू :

तक्रारीनंतर विठ्ठलवाडी पोलिसांनी कलम ४०६ आणि ४२० अंतर्गत गुन्हा दाखल केला आहे. वरिष्ठ पोलीस निरीक्षक चंद्रहास गोडसे यांच्या माहितीनुसार, आरोपींचे जबाब नोंदवण्यासाठी त्यांना नोटिसा बजावण्यात आल्या आहेत. अद्याप या प्रकरणात कोणालाही अटक करण्यात आलेली नाही. दरम्यान, सेंट्रल हॉस्पिटलमधील कोणत्याही कर्मचाऱ्याचा या कथित व्यवहारात सहभाग होता का, याचाही तपास पोलीस करत आहेत. चव्हाण यांनी राज्याच्या आरोग्यमंत्र्यांकडेही तक्रार करत सरकारी नोकरीच्या बदल्यात पैसे घेतल्याच्या कथित प्रकरणाची चौकशी करण्याची मागणी केली आहे. (Nisha Bhagat Fraud Case)

या प्रकरणातील आरोप तक्रारदार महिलेने केलेले असून, त्यांची सत्यता तपासण्याचे काम पोलिसांकडून सुरू आहे. आरोपी दोषी असल्याचे न्यायालयीनरीत्या सिद्ध झालेले नाही. (Nisha Bhagat Fraud Case)