Nashik : यशवंतराव चव्हाण महाराष्ट्र मुक्त विद्यापीठाच्या (Yashwantrao Chavan Maharashtra Open University) १३ विद्याशाखांतील १३० पदव्युत्तर पदवी, पदवी, पदविका व प्रमाणपत्र शिक्षणक्रमांच्या प्रवेश प्रक्रियेस विनाविलंब शुल्कासह १५ सप्टेंबर २०२६ पर्यंत मुदतवाढ देण्यात आली आहे. शैक्षणिक वर्ष २०२६-२७ च्या जुलै सत्रासाठी ही ऑनलाइन प्रवेश प्रक्रिया सुरू आहे.
विद्यापीठाचे कुलगुरू प्रा. संजीव सोनवणे यांच्या मार्गदर्शनाखाली व प्र-कुलगुरू डॉ. जोगेंद्रसिंह बिसेन यांच्या नियोजनानुसार पारंपरिक तसेच विविध नवीन व व्यावसायिक शिक्षणक्रम उपलब्ध आहेत. संगणकशास्त्र, माहिती तंत्रज्ञान, ड्रोन तंत्रज्ञान, ऑटोमोबाईल तंत्रज्ञान, सायबर क्राईम तपास, डेटा ॲनालिटिक्स, कृत्रिम बुद्धिमत्ता, योगशिक्षक, समुपदेशन व मानसिक स्वास्थ्य, भारतीय ज्ञान प्रणाली आदी शिक्षणक्रमांचा त्यात समावेश आहे.
- दिल्लीत दाखल; शिवसेना पक्ष आणि चिन्हाबाबत सर्वोच्च न्यायालयात उद्या महत्त्वपूर्ण सुनावणी मुंबई : उपमुख्यमंत्री तथा शिवसेनेचे मुख्य नेते एकनाथ ...
विद्यापीठाच्या दूरस्थ शिक्षण पद्धतीमुळे नोकरी-व्यवसाय करणारे, गृहिणी तसेच नियमित महाविद्यालयात जाणे शक्य नसलेल्या विद्यार्थ्यांना घरबसल्या शिक्षण घेण्याची संधी उपलब्ध आहे. विद्यापीठ अनुदान आयोगाच्या (युजीसी) नवीन नियमानुसार नियमित पदवीसोबत दूरशिक्षणाद्वारे आणखी एक पदवी किंवा मुक्त विद्यापीठाच्या दोन पदव्यांना एकाचवेळी प्रवेश घेता येणार आहे. इच्छुक विद्यार्थ्यांनी विद्यापीठाच्या अधिकृत संकेतस्थळावर ऑनलाइन प्रवेश घ्यावा किंवा नजीकच्या अभ्यास केंद्राशी संपर्क साधावा. अधिक माहितीसाठी ०२५३-२२३०५८० / २२३१७१५ / २२३०१०६ / २२३०७१४ तसेच ९३०७५७९८७४, ९३०७५६७१८२, ९२७२०४६७२५ या क्रमांकांवर संपर्क साधावा, असे आवाहन विद्यापीठाचे प्रभारी कुलसचिव डॉ. सुरेंद्र पाटोळे व विद्यार्थी सेवा विभाग संचालक डॉ. प्रकाश देशमुख यांनी केले आहे.
विद्यापीठातील निरंतर शिक्षण, मानव्यविद्या व सामाजिकशास्त्रे, विज्ञान, वाणिज्य व व्यवस्थापन, कृषिविज्ञान, शिक्षणशास्त्र, आरोग्य विज्ञान, स्कूल ऑफ डिजिटल एज्युकेशन, संगणकशास्त्र, महाज्ञानदीप, ग्रामीण विकास व उद्योजकता, ललित कला केंद्र तसेच व्यावसायिक शिक्षण व कौशल्य विकास या १३ विद्याशाखांमधील १३० शिक्षणक्रम प्रवेशासाठी उपलब्ध आहेत.