Khar Pub Assault Case : खारमध्ये २८ वर्षीय युगांडाच्या व्यावसायिकावर हल्ला; सीसीटीव्हीच्या आधारे सहा जण ताब्यात

मुंबई : खार पश्चिम परिसरातील एका पबमध्ये झालेल्या किरकोळ वादानंतर २८ वर्षीय युगांडाच्या व्यावसायिकावर दोनदा हल्ला केल्याचा आरोप करण्यात आला आहे. या प्रकरणी खार पोलिसांनी आठ जणांविरोधात एफआयआर दाखल केला आहे. सोमवारी पहाटे हा प्रकार घडल्याची माहिती पोलिसांनी दिली. (Khar Pub Assault Case)

तक्रारदार प्रिन्स लुईस मुशाबे (२८) हे युगांडाचे व्यावसायिक असून, खार पश्चिम येथील ‘रास्ता बॉम्बे’ पबमध्ये ते उपस्थित होते. ते एका अनोळखी व्यक्तीशी हस्तांदोलन करत असताना चुकून त्यांचा कोपरा एका महिलेला लागला. त्यानंतर संबंधित महिलेने आणि तिच्यासोबत असलेल्या एका पुरुष मित्राने मुशाबे यांना थप्पड मारल्याचा आरोप आहे. पबमधील बाऊन्सरने हस्तक्षेप केल्यानंतर परिस्थिती नियंत्रणात आली. (Khar Pub Assault Case)

युनियन बँकेजवळ पुन्हा मारहाण :

यानंतर मुशाबे यांची त्याच महिलेशी ५व्या रोडवरील युनियन बँकेजवळ पुन्हा भेट झाली. यावेळी महिलेच्या एका मित्राने त्यांना धक्का देऊन खाली पाडले आणि मारहाण केल्याचा आरोप तक्रारीत करण्यात आला आहे.या घटनेत त्यांच्या मनगटातील घड्याळाचे नुकसान झाले. तसेच डाव्या कानाने ऐकू येत नसल्याचेही त्यांनी पोलिसांना सांगितले आहे. (Khar Pub Assault Case)

सीसीटीव्हीच्या मदतीने सहा जणांचा शोध :

पोलिसांनी परिसरातील सीसीटीव्ही फुटेजच्या आधारे अवघ्या १२ तासांत सहा संशयितांचा शोध घेतला. त्यांना गोरेगावमधील त्यांच्या घरातून ताब्यात घेण्यात आले. चौकशीनंतर पोलिसांनी त्यांना नोटीस बजावून सोडले. (Khar Pub Assault Case)

पोलिसांनी दिलेल्या माहितीनुसार, आरोपींमध्ये मुराद अल रहिसी (२६), रितिका अल रहिसी (२५), नईमुद्दीन शेख (३७), मोहित रामराजे (२३), नवनीत झा (२८) आणि अर्णव झा (२८) यांचा समावेश आहे. हे सर्वजण संघर्ष करणारे अभिनेते आणि बॅकग्राउंड आर्टिस्ट असल्याचे पोलिसांनी सांगितले. अन्य दोन आरोपींची ओळख अद्याप पटलेली नाही. (Khar Pub Assault Case)

नेमका वाद कशामुळे झाला?

आरोपींच्या म्हणण्यानुसार, मुशाबे यांनी त्यांच्या महिला मैत्रिणीसोबत गैरवर्तन केले होते. मात्र, मुशाबे यांनी हा आरोप फेटाळून लावला आहे. त्यामुळे पबमध्ये नेमका वाद कशामुळे सुरू झाला आणि त्यानंतर हाणामारी कशी झाली, याचा तपास पोलिसांकडून सुरू आहे. घटनेशी संबंधित अधिक सीसीटीव्ही फुटेज मिळवून संपूर्ण प्रकाराची सत्यता पडताळण्याचे काम खार पोलीस करत आहेत. (Khar Pub Assault Case)