Ahilyanagar Crime : दोघेही घरातून बेपत्ता... विहिरीजवळ सापडली चप्पल अन् दप्तर, पुढे जे घडलं ते धक्कादायक होतं

Ahilyanagar Crime : अहिल्यानगर जिल्ह्यातील कर्जत तालुक्यात एक खळबळजनक घटना उघडकीस आली आहे. कर्जत तालुक्यातील खुरंगेवाडी येथे एका अल्पवयीन तरुणीचा आणि एका २० वर्षीय तरुणाचा मृतदेह विहिरीत आढळल्याने परिसरात एकच खळबळ उडाली आहे. याप्रकरणी मिरजगाव पोलिस ठाण्यात अकस्मात मृत्यूची नोंद करण्यात आली आहे. (Ahilyanagar Crime News)

नेमकं प्रकरण काय ?

कर्जत तालुक्यातील खुरंगेवाडी येथे १७ वर्षीय अल्पवयीन मुलगी आणि २० वर्षीय वैभव भाऊसाहेब शिंगाडे या दोघांचा मृतदेह विहिरीत आढळल्याने एकच खळबळ उडाली. पोलिसांकडून मिळालेल्या माहितीनुसार दोघेही महाविद्यालयीन विद्यार्थी आहे. दोघेही घरातून बेपत्ता होते. कुटुंबीय व नातेवाईक त्यांचा शोध घेत असताना 2 सप्टेंबर रोजी सकाळी गावाजवळील बसस्थानकापासून सुमारे 400 मीटर अंतरावरील विहिरीजवळ वैभवची चप्पल आणि वैष्णवीचे दप्तर आढळले. (Ahilyanagar Crime News)

मिरजगाव पोलिस ठाण्यात अकस्मात मृत्यूची नोंद

दरम्यान घटनेची माहिती मिळताच मिरजगाव पोलिसांनी घटनास्थळी धाव घेत शोधाशोध सुरु केली. शोध घेत असताना विहिरीत तरुणीचा मृतदेह पोलिसांना आढळला. तिच्या अंगावर शालेय गणवेश होता. मृतदेह मिरजगाव प्राथमिक आरोग्य केंद्रात वैद्यकीय तपासणीसाठी नेण्यात आला. धक्कादायक म्हणजे सायंकाळी त्याच विहिरीत वैभवचाही मृतदेह आढळून आला. या घटनेनं परिसरात एकच खळबळ उडाली आहे. याप्रकरणी मिरजगाव पोलिस ठाण्यात (Mirajgaon Police Station) अकस्मात मृत्यूची नोंद करण्यात आली आहे. पोलिसांकडून या घटनेचा अधिक तपास सुरू आहे.