Chandrapur Crime News : रक्षाबंधनानिमित्त बहिणीसाठी केलेला मटणाचा बेत भावांच्या जीवावर बेतला

चंद्रपूर : रक्षाबंधनानिमित्त माहेरी आलेल्या बहिणीसाठी केलेल्या मटणाच्या बेतातील उरलेल्या मटणावरून झालेला किरकोळ वाद रक्तरंजित ठरला. मटणावरून झालेल्या वादातून मोठ्या भावाने लहान भावावर कुऱ्हाडीने जीवघेणा हल्ला करत त्याची हत्या केल्याची धक्कादायक घटना चंद्रपूर जिल्ह्यातील चिमूर तालुक्यातील शंकरपूर येथे घडली. २ सप्टेंबर रोजी सायंकाळच्या सुमारास ही घटना घडली असून, या प्रकारामुळे परिसरात एकच खळबळ उडाली आहे. (Chandrapur Crime News)

मिळालेल्या माहितीनुसार, रमेश श्रीराम बनकर (वय ५५) असे हत्या झालेल्या व्यक्तीचे नाव आहे. तर या प्रकरणातील आरोपी त्यांचा मोठा भाऊ जगन श्रीराम बनकर (वय ६०) याला भिसी पोलिसांनी अटक केली आहे. (Chandrapur Crime News)

रक्षाबंधनासाठी बहिणीच्या स्वागताला मटणाचा बेत :

रक्षाबंधनाच्या निमित्ताने बहीण घरी आली होती. तिच्या स्वागतासाठी कुटुंबीयांनी सकाळी मटणाचा बेत केला होता. बहीण राखी बांधून परतल्यानंतर सायंकाळी घरात उरलेल्या मटणावरून जगन आणि रमेश या दोन्ही भावांमध्ये वाद सुरू झाला. मिळालेल्या माहितीनुसार, दोघेही दारूच्या नशेत असल्याने किरकोळ कारणावरून सुरू झालेला वाद हळूहळू विकोपाला गेला. संतापाच्या भरात जगनने घरातील कुऱ्हाड हातात घेत रमेश यांच्यावर हल्ला केला. (Chandrapur Crime News)

मानेवर आणि डोक्यावर कुऱ्हाडीचे वार :

आरोपी जगनने रमेश यांच्या डोक्यावर आणि मानेवर कुऱ्हाडीने गंभीर वार केले. या हल्ल्यात रमेश गंभीर जखमी होऊन रक्ताच्या थारोळ्यात कोसळले. या हल्ल्यात त्यांचा जागीच मृत्यू झाल्याची माहिती समोर आली आहे. घटनेची माहिती मिळताच भिसी पोलिसांनी तातडीने घटनास्थळी धाव घेतली. पोलिसांनी मृतदेह ताब्यात घेतला असून, आरोपी जगन बनकर याला अटक करण्यात आली आहे. या प्रकरणाचा पुढील तपास भिसी पोलीस करत आहेत. (Chandrapur Crime News)

किरकोळ घरगुती वादातून भावानेच भावाचा जीव घेतल्याने शंकरपूर परिसरात हळहळ व्यक्त केली जात आहे. रक्षाबंधनासारख्या भावंडांच्या नात्याचा सण नुकताच पार पडलेला असताना घडलेल्या या घटनेने परिसरातील नागरिकांनाही धक्का बसला आहे. (Chandrapur Crime News)