डहाणू रेल्वे स्थानकावरून पहाटेच्या सुमारास बोरिवलीच्या दिशेने जाणाऱ्या डहाणू-बोरिवली मेमू रेल्वेमध्ये 20 वर्षीय महाविद्यालयीन तरुणीवर हल्ल्याचा प्रयत्न झाल्याची धक्कादायक घटना समोर आली आहे. महिला डब्यात तरुणी एकटी असल्याची संधी साधून एका अज्ञात इसमाने तिच्यावर हल्ला करत जबरदस्ती करण्याचा प्रयत्न केल्याची माहिती आहे. मात्र, तरुणीने प्रसंगावधान राखत केलेल्या धाडसी प्रतिकारामुळे मोठा अनर्थ टळला.
मिळालेल्या माहितीनुसार, सकाळी 5.17 वाजता डहाणू स्थानकातून मेमू लोकल सुटली. यावेळी महिला डब्यात ही तरुणी एकटीच प्रवास करत होती. अंदाजे 27 ते 28 वर्षांचा एक अज्ञात इसम महिला डब्यात शिरला. त्याने सुरुवातीला गाडी कुठे पोहोचली आहे, अशी विचारणा करत तरुणीचे लक्ष विचलित करण्याचा प्रयत्न केला. त्यानंतर तरुणी एकटी असल्याचे पाहून त्याने अचानक तिचा गळा दाबत तिच्यावर जबरदस्ती करण्याचा प्रयत्न केल्याचा आरोप आहे.
Nashik MHADA Scam : नाशिकमधील बहुचर्चित म्हाडा भूखंड फसवणूक प्रकरणात अखेर महसूल प्रशासनाने कारवाईचा बडगा उगारला आहे. या प्रकरणात बेकायदेशीरपणे काम केल्याचा ...
अचानक झालेल्या या हल्ल्याने तरुणी घाबरली नाही. तिने स्वतःचा बचाव करण्यासाठी संशयिताच्या डोळ्यांत बोटे घालून त्याला मागे ढकलले आणि जोरात आरडाओरड केली. तिचा आवाज ऐकून लगतच्या डब्यातील प्रवासी मदतीसाठी धावून आले. प्रवाशांनी संशयिताला पकडण्याचा प्रयत्न केला. मात्र, वाणगाव स्थानकाजवळ झालेल्या झटापटीचा फायदा घेत संशयित आरोपी पळून जाण्यात यशस्वी झाला.
घटनेनंतर तरुणीने तातडीने 112 या आपत्कालीन क्रमांकावर संपर्क साधण्याचा प्रयत्न केल्याचे सांगितले जात आहे. मात्र, तत्काळ मदत मिळाली नसल्याचा आरोप करण्यात येत आहे. तसेच रेल्वे सुरक्षा दलाकडूनही अपेक्षित प्रतिसाद मिळाला नसल्याच्या तक्रारी सोशल मीडियावर व्हायरल होत आहेत. या दाव्यांची अधिकृत पुष्टी अद्याप स्पष्ट झालेली नाही.
पहाटेच्या वेळी महिला डब्यात घडलेल्या या घटनेमुळे रेल्वे प्रवासातील महिला सुरक्षेचा प्रश्न पुन्हा ऐरणीवर आला आहे. दरम्यान, जीवघेण्या परिस्थितीतही तरुणीने दाखवलेल्या धैर्याचे कौतुक होत आहे. या प्रकरणात रेल्वे प्रशासन आणि पोलिसांकडून पुढील तपास करण्यात येत आहे.