अंबरनाथ : ठाणे जिल्ह्यातील अंबरनाथ रेल्वे स्थानकातून सुरक्षेच्या चिंतेत भर घालणारी एक अत्यंत सुन्न करणारी घटना समोर आली आहे. वॉकरच्या साहाय्याने थेट रेल्वे रुळ ओलांडणाऱ्या एका दिव्यांग (अपंग) व्यक्तीचा व्हिडिओ सध्या सोशल मीडियावर तुफान व्हायरल होत आहे. लोकल ट्रेन अगदी प्लॅटफॉर्मच्या जवळ आलेली असताना, तिथे उपस्थित असलेल्या इतर प्रवाशांनी दाखवलेल्या तत्परतेमुळे या व्यक्तीचा जीव थोडक्यात वाचला.
नेमकं काय घडलं व्हिडिओमध्ये ?
व्हायरल व्हिडिओमध्ये स्पष्टपणे दिसतंय की, हा दिव्यांग व्यक्ती वॉकरच्या मदतीने अत्यंत संथ गतीने दोन रेल्वे रुळ ओलांडून दुसऱ्या बाजूच्या प्लॅटफॉर्मवर जाण्याचा प्रयत्न करत होता. चालताना त्याचा होणारा संघर्ष पाहून स्थानकावरील इतर प्रवाशांचे लक्ष त्याच्याकडे गेले. तो प्लॅटफॉर्मवर चढण्यासाठी धडपडत असतानाच, काही प्रवाशांनी क्षणाचाही विलंब न लावता त्याच्याकडे धाव घेतली आणि त्याला सुरक्षितपणे प्लॅटफॉर्मवर वर खेचून घेतले. प्रवाशांनी त्याला वर घेतल्यानंतर अवघ्या काही सेकंदांतच त्याच रुळावरून एक लोकल ट्रेन प्लॅटफॉर्मवर दाखल झाली. प्रवाशांनी वेळेवर मदत केली नसती, तर मोठा अनर्थ घडला असता.
चंद्रपूर : रक्षाबंधनानिमित्त माहेरी आलेल्या बहिणीसाठी केलेल्या मटणाच्या बेतातील उरलेल्या मटणावरून झालेला किरकोळ वाद रक्तरंजित ठरला. मटणावरून ...
रेल्वे प्रशासनाच्या सोयीसुविधांवर प्रश्नचिन्ह
या थरारक घटनेचा व्हिडिओ समोर आल्यानंतर नेटिझन्सकडून संतप्त प्रतिक्रिया येत आहेत. अंबरनाथसारख्या गजबजलेल्या स्थानकात दिव्यांगांसाठी पुरेशा सुविधा नसल्याचा आरोप प्रवाशांनी केला आहे. स्थानकात लिफ्ट किंवा सरकता जिना (Escalator) उपलब्ध नसल्यामुळे गर्दीच्या वेळी दिव्यांगांना एका प्लॅटफॉर्मवरून दुसऱ्या प्लॅटफॉर्मवर जाणे अत्यंत कठीण होते, असा दावा अनेक प्रवाशांनी केला आहे.
रेल्वे रुळ ओलांडणे हा कायद्याने गुन्हा!
या घटनेनंतर रेल्वे प्रशासनाने पुन्हा एकदा प्रवाशांना रुळ ओलांडण्याऐवजी पादचारी पूल (FOB) किंवा भुयारी मार्गाचा वापर करण्याचे आवाहन केले आहे. रेल्वे कायदा १९८९ च्या कलम १४७ नुसार, विनापरवाना रेल्वे रुळ किंवा बंदी घातलेल्या क्षेत्रात प्रवेश करणे (Trespassing) हा शिक्षेस पात्र गुन्हा आहे. असा गुन्हा करताना आढळल्यास १,००० रुपयांपर्यंतचा दंड, ६ महिन्यांपर्यंतचा कारावास किंवा दोन्ही शिक्षा होऊ शकतात. हा व्यक्ती चालताना एवढा मोठा धोका पत्करून रुळांवर का उतरला, याचे नेमके कारण अद्याप स्पष्ट झालेले नाही. मात्र, या घटनेने रेल्वे सुरक्षेचा प्रश्न आणि दिव्यांगांना स्थानकांवर मिळणाऱ्या सुविधांची वास्तवता पुन्हा एकदा चव्हाट्यावर आणली आहे.