नागपूर : सध्या संपूर्ण महाराष्ट्रात गणेशोत्सवाचा आणि आगामी सणांचा उत्साह शिगेला पोहोचला असून गणेश मंडळे तयारीला लागली आहेत. सणासुदीच्या याच पार्श्वभूमीवर नागपूर शहरातून एक अत्यंत महत्त्वपूर्ण आणि मोठा निर्णय समोर आला आहे. नागपूरचे पोलीस आयुक्त विश्वास नांगरे पाटील (Vishwas Nangare Patil) यांनी ३ सप्टेंबरच्या रात्रीपासून ते १ नोव्हेंबरपर्यंत शहरात डीजे, डॉल्बी साऊंड सिस्टिम, डीजे वाहने, डिम लाईट्स आणि डोळ्यांना इजा पोहोचवणाऱ्या लेझर लाईट्सच्या वापरावर पूर्णपणे बंदी घालण्याचे आदेश जारी केले आहेत. उत्सवाच्या काळात नागरिकांची सुरक्षितता राखणे आणि ध्वनी तसेच प्रकाश प्रदूषणावर नियंत्रण मिळवणे हा या निर्णयामागील मुख्य उद्देश आहे. या नियमांचे उल्लंघन करणाऱ्यांवर कडक कायदेशीर कारवाई केली जाईल, असा स्पष्ट इशारा नागपूर पोलिसांनी दिला आहे.
श्रावण आणि भाद्रपद महिन्यांचे आगमन म्हणजे भारतीय संस्कृतीत विविध धार्मिक सण-उत्सवांची पर्वणीच असते. या काळात आबालवृद्धांना वेध लागतात ते म्हणजे ...
नागपूरमधील या निर्णयामुळे मिरवणुकांमध्ये डिजेच्या तालावर थिरकणाऱ्या गणेश भक्तांवर काहीसे निर्बंध आले असले, तरी दुसरीकडे पुणे शहरातही अशाच प्रकारच्या बंदीची मागणी जोर धरू लागली आहे. पुण्यातील विद्यानंद बापट नावाच्या सामान्य नागरिकाने ध्वनी प्रदूषणाचा मुद्दा उपस्थित करत महापालिकेच्या बैठकीत डीजे, डॉल्बी आणि ढोल-ताशांवर बंदी घालण्याची मागणी केली आहे. अतिप्रमाण वाढणाऱ्या आवाजामुळे पुणेकरांना त्रास होत असून ढोल-ताशांसारखी वाद्ये कालबाह्य झाल्याचा दावा त्यांनी केला आहे. एकीकडे नागपुरात प्रशासनाने कडक पावले उचलली असताना, पुण्यातील गणेश मंडळे या वाढत्या मागण्यांवर आणि नागपूरच्या निर्णयावर काय भूमिका घेतात, याकडे संपूर्ण राज्याचे लक्ष लागले आहे.
