पिंपरी-चिंचवड : ऐन सणासुदीच्या तोंडावर पिंपरी-चिंचवडकरांची चिंता वाढवणारी बातमी समोर आली आहे. शहरात स्वाईन फ्लूने पुन्हा डोके वर काढले असून ऑगस्ट महिन्यात तब्बल 31 रुग्ण आढळले आहेत. मात्र, सुदैवाने सर्व रुग्णांची प्रकृती स्थिर असल्याची माहिती आहे. त्यामुळे नागरिकांनी घाबरून न जाता योग्य ती खबरदारी घ्यावी, असे आवाहन महापालिका प्रशासनाकडून करण्यात आले आहे. ( Swine Flu)
शहरात यावर्षी जानेवारी महिन्यात स्वाईन फ्लूचा 1 रुग्ण आढळला होता. त्यानंतर जुलैमध्ये 5 रुग्णांची नोंद झाली. मात्र ऑगस्टमध्ये रुग्णसंख्येत अचानक वाढ होऊन 31 जणांना स्वाईन फ्लूची लागण झाल्याचे समोर आले आहे.
मंडळातील किमान ८ ते १० स्वयंसेवकांना मिळणार प्रशिक्षण मुंबई ( विशेष प्रतिनिधी) : मुंबईतील सार्वजनिक श्रीगणेशोत्सव मंडळांनी उत्सव साजरा करताना कोणती ...
गेल्या काही वर्षांच्या आकडेवारीवर नजर टाकल्यास 2022 मध्ये पिंपरी-चिंचवडमध्ये स्वाईन फ्लूचे 58 रुग्ण आढळले होते. त्यापैकी ऑगस्ट महिन्यात 34 रुग्णांची नोंद झाली होती. तर 2024 मध्ये शहरात 15 रुग्णांना स्वाईन फ्लूची लागण झाली होती. ( PCMC)
दरम्यान, गणेशोत्सवाच्या काळात मोठ्या प्रमाणात गर्दी होते. त्यामुळे नागरिकांनी गर्दीच्या ठिकाणी जाणे शक्यतो टाळावे, मास्कचा वापर करावा आणि वारंवार हात स्वच्छ धुवावेत, असा सल्ला महापालिकेच्या वैद्यकीय अधिकाऱ्यांनी दिला आहे. सर्दी, खोकला किंवा तापाची लक्षणे आढळल्यास स्वतःहून औषधे घेण्याऐवजी डॉक्टरांचा सल्ला घ्यावा, असेही आवाहन करण्यात आले आहे. ( Swine Flu in Pimpri Chinchwad)
स्वाईन फ्लू म्हणजे काय?
स्वाईन फ्लूला H1N1 फ्लू असेही म्हटले जाते. हा इन्फ्लूएन्झा विषाणूमुळे होणारा श्वसनाचा संसर्ग आहे. संक्रमित व्यक्तीच्या खोकताना किंवा शिंकताना बाहेर पडणाऱ्या थेंबांमधून याचा प्रसार होऊ शकतो. तसेच संक्रमित व्यक्ती किंवा दूषित वस्तूंना स्पर्श केल्यानंतर नाक, तोंड किंवा डोळ्यांना हात लावल्यासही संसर्ग होण्याची शक्यता असते.(Symptoms of Swine Flu)
स्वाईन फ्लूची प्रमुख लक्षणे
- सर्दी आणि ताप
- घसा खवखवणे
- सतत खोकला
- नाक वाहणे
- डोकेदुखी
- डोळ्यात पाणी येणे
- अतिशय थकवा जाणवणे
- काही रुग्णांमध्ये श्वास घेण्यास त्रास किंवा न्यूमोनिया
ज्येष्ठ नागरिक, गर्भवती महिला तसेच मधुमेह, हृदयविकार, उच्च रक्तदाब, मूत्रपिंड, यकृत किंवा श्वसनाशी संबंधित आजार असलेल्या व्यक्तींनी अधिक काळजी घेणे आवश्यक आहे.
H1N1 ची लक्षणे जाणवल्यास स्वतःहून औषधोपचार करण्याऐवजी डॉक्टरांचा सल्ला घ्यावा. लक्षणे जास्त असल्यास किंवा श्वास घेण्यास त्रास होत असल्यास तातडीने वैद्यकीय मदत घ्यावी.
