Nepal Car Accident : नेपाळमध्ये फेवा तलावात कार कोसळून अपघात; दोन भारतीयांचा मृत्यू, दोघे जखमी

पोखरा : नेपाळमधील पोखरा येथे शुक्रवारी पहाटे एक कार फेवा तलावात कोसळल्याने अपघात घडला. या अपघातात दोन भारतीय नागरिकांचा मृत्यू झाला, तर अन्य दोन जण जखमी झाले. (Nepal Car Accident)

गंडकी प्रांत पोलीस कार्यालयाचे प्रमुख जितेंद्र बी.सी. यांनी सांगितले की, बिहारच्या नोंदणी क्रमांकाची ही कार पहाटे सुमारे 4:50 वाजता तलावात कोसळली. मृतांपैकी एका व्यक्तीची ओळख बिहारमधील पूर्व चंपारण जिल्ह्यातील रक्सौल येथील 26 वर्षीय नवदीप कुमार यादव अशी झाली आहे. दुसऱ्या मृत भारतीय नागरिकाची ओळख अद्याप पटलेली नाही. (Nepal Car Accident)

जखमी भारतीय नागरिकांची ओळख रक्सौल येथील 27 वर्षीय अनमोल कुमार यादव आणि 33 वर्षीय सूरज यादव अशी झाली आहे. दोघांनाही तलावातून सुरक्षित बाहेर काढून उपचारासाठी गंडकी मेडिकल कॉलेजमध्ये दाखल करण्यात आले. त्यांची प्रकृती स्थिर असल्याचे सांगण्यात आले आहे. (Nepal Car Accident)

पोलिसांनी सांगितले की, हा अपघात पोखरा-18 मधील गौरीचौतारा वळणाजवळ झाला. सेदीहून तलावाच्या दिशेने जात असताना चालकाचे वाहनावरील नियंत्रण सुटले आणि त्यानंतर कार तलावात कोसळली. अपघाताची माहिती मिळताच बचावकार्य करण्यासाठी सुमारे दोन डझन सुरक्षा कर्मचाऱ्यांचे पथक घटनास्थळी पाठवण्यात आले. क्रेनच्या मदतीने कार तलावातून बाहेर काढण्यात आली.

माध्यमांच्या वृत्तानुसार, दोन्ही मृतांना पाण्यातून बेशुद्ध अवस्थेत बाहेर काढून पोखरा अकादमी ऑफ हेल्थ सायन्सेस येथे नेण्यात आले. तेथे डॉक्टरांनी त्यांना मृत घोषित केले.या अपघाताची पोलिसांनी चौकशी सुरू केली असून, नेमका अपघात कशामुळे झाला याचा तपास केला जात आहे. (Nepal Car Accident)