कृष्णजन्माष्टमीचा उत्साह आणि आनंद संगीताशिवाय अपूर्णच मानला जातो. भक्तिमय स्वरांपासून ते दहीहंडीच्या जल्लोषापर्यंत आणि सोशल मीडियावरील रील्सवर व्हायरल होणाऱ्या ट्रॅक्सपर्यंत, बॉलिवूडने श्रीकृष्णाच्या विविध रूपांवर अप्रतिम गाणी दिली आहेत. या वर्षी जन्माष्टमी साजरी करताना श्रीकृष्णाच्या नटखट लीला आणि महिमा वर्णन करणारी ही आयकॉनिक गाणी तुमच्या प्लेलिस्टमध्ये नक्की समाविष्ट करा.
यशोमती मैया से बोले नंदलाला
'सत्यम शिवम सुंदरम' या चित्रपटातील लता मंगेशकर आणि मन्ना डे यांनी गायलेले हे गाणे आजही अजरामर आहे. बालकृष्णाचे गोड प्रश्न आणि माता यशोदेचे वात्सल्य यांचे सुंदर वर्णन या गाण्यातून केले आहे. जन्माष्टमीच्या दिवशी भक्तीमय वातावरण निर्माण करण्यासाठी हे गाणे आजही पहिले मानले जाते.
राधा कैसे न जले
२००१ मधील 'लगान' चित्रपटातील हे प्रसिद्ध गाणे राधा आणि श्रीकृष्णाच्या खोडकर प्रेमावर आधारित आहे. ए. आर. रहमान यांचे संगीत, जावेद अख्तर यांचे शब्द आणि आशा भोसले व उदित नारायण यांचे स्वर लाभलेले हे गाणे आमिर खान आणि ग्रेसी सिंग यांच्यावर चित्रित करण्यात आले आहे.
वो कृष्णा है
'किसना: द वॉरियर पोएट' (२००५) या चित्रपटातील हे गाणे सुखविंदर सिंग, एस. शैलजा आणि आयेशा दरबार यांनी गायले आहे. श्रीकृष्णाचे रूप, त्यांचे गुण आणि पराक्रमाचे वर्णन करणारे हे आक्रमक अन् उत्साहवर्धक गाणे जन्माष्टमीच्या दिवशी रील्स बनवण्यासाठी आणि नृत्य करण्यासाठी खूप लोकप्रिय आहे.
ओ पालनहारे
'लगान' चित्रपटातील हे अत्यंत भावुक आणि भक्तीमय गाणे आहे. लता मंगेशकर आणि उदित नारायण यांच्या सुमधुर आवाजातील हे गाणे ऐकून मन प्रसन्न होते. ए. आर. रहमान यांच्या संगीताने सजलेले हे प्रार्थना-गीत पूजेच्या वेळी ऐकण्यासाठी सर्वोत्तम मानले जाते.
मन मोहना
'जोधा अकबर' या ऐतिहासिक चित्रपटातील 'मन मोहना' हे गाणे ऐकणाऱ्याला एका वेगळ्याच भक्तीरसात घेऊन जाते. बेला शेंडे यांनी अत्यंत शांत आणि सुंदर पद्धतीने हे गाणे गायले असून, याला ए. आर. रहमान यांचे संगीत लाभले आहे.
सो जा जरा
'बाहुबली २: द कन्क्लुजन' (२०१७) मधील एम. एम. कीरावानी यांचे 'सो जा जरा' हे शांत आणि प्रेमळ लुलबी (अंगाई गीत) श्रीकृष्णाच्या प्रसंगांवर आधारित आहे. अनुष्का शेट्टीवर चित्रित झालेले आणि सोशल मीडियावर तुफान व्हायरल झालेले हे गाणे जन्माष्टमीच्या प्लेलिस्टला एक वेगळा अन् शांत स्पर्श देते.
