Auto Rickshaw Meter Fraud : टॅक्सी-रिक्षांच्या मीटरमध्ये इलेक्ट्रॉनिक उपकरण; दहिसरमध्ये प्रवाशांची उघड फसवणूक

मुंबई : दहिसर पोलिसांनी टॅक्सी आणि ऑटोरिक्षांच्या मीटरमध्ये फेरफार करून प्रवाशांची फसवणूक केल्याप्रकरणी पाच जणांविरुद्ध गुन्हा दाखल केला आहे. आरोपींनी भाड्यात फेरफार करण्यासाठी मीटरमध्ये इलेक्ट्रॉनिक उपकरणे बसवल्याचा आरोप आहे. पुढील तपासात असे उघड झाले की, आरोपींपैकीच एक असलेल्या ३१ वर्षीय अमीन पठाण टॅक्सी आणि ऑटोरिक्षांमध्ये ही उपकरणे बसवली होती. (Auto Rickshaw Meter Fraud)

पोलिसांच्या माहितीनुसार, दहिसरमध्ये अनेक टॅक्सी आणि ऑटोरिक्षा चालक त्यांच्या वाहनांच्या मीटरमध्ये फेरफार करून प्रवाशांकडून जास्त भाडे आकारत असल्याची माहिती सहायक पोलीस निरीक्षक निलेश सालिउंखे यांना मिळाली. या माहितीच्या आधारे, पोलिसांनी १ ऑगस्ट रोजी सायंकाळी ७ वाजण्याच्या सुमारास एका टॅक्सीमध्ये बनावट प्रवासी पाठवला. (Auto Rickshaw Meter Fraud)

प्रवासादरम्यान, प्रवाशाच्या लक्षात आले की टॅक्सी चालकाने मीटर कापडाने झाकले आहे व त्याचबरोबर या प्रवाशाला त्याचे वर्तनही संशयास्पद वाटले. प्रवाशाने दहिसर ते जोगेश्वरी असा प्रवास केला. प्रवास पूर्ण झाल्यावर, त्या बनावट प्रवाशाने पोलिसांना याची माहिती दिली. पोलीस घटनास्थळी पोहोचले आणि त्यांनी चालकाला मीटर का लपवले याबद्दल विचारणा केली. टॅक्सी चालकाची ओळख ३२ वर्षीय जोआब देशमुख अशी पटली. त्याने समाधानकारक स्पष्टीकरण दिले नाही. त्यामुळे या प्रकरणाची आणखी कसून चौकशी करण्यात आली. (Auto Rickshaw Meter Fraud)

पुढील तपासात पोलिसांना आढळून आले की, मीटरमध्ये एक इलेक्ट्रॉनिक सर्किट उपकरण बसवण्यात आले होते, ज्यामुळे भाडे कृत्रिमरित्या वाढवण्यात येत होते. पुढे असेही उघड झाले की, ३१ वर्षीय अमीन पठाणने कथितरित्या इतर चार टॅक्सी आणि ऑटोरिक्षांमध्येही तेच उपकरण बसवले होते. पोलिसांनी भारतीय न्याय संहितेच्या (बीएनएस) कलम ३४ अन्वये, इतर संबंधित तरतुदींनुसार सर्व पाच जणांवर गुन्हा दाखल केला आहे. आरोपींची नावे जोआब देशमुख (३२), अमीन पठाण (३१), रियाझ शेख (४५), नझीर पटेल (५७) आणि आनंद कुमार राय (६०) अशी आहेत. (Auto Rickshaw Meter Fraud)