Solapur Crime : शेअर मार्केटमध्ये २० लाखांचं झालं नुकसान; कर्ज फेडण्यासाठी यूट्यूब व्हिडिओ पाहून घरफोडीचा प्रयत्न, पण घडलं काहीतरी वेगळंच...

सोलापूर : माढा तालुक्यातील जामगाव येथे घरफोडीच्या उद्देशाने घरात घुसलेल्या तरुणाने ६१ वर्षीय वृद्धाचा खून करून सोन्याचे दागिने लंपास केल्याची धक्कादायक घटना समोर आली आहे. शेअर मार्केटमध्ये मोठे नुकसान झाल्याने झालेलं कर्ज फेडण्यासाठी आरोपीने चोरीचा कट रचल्याचे पोलिस तपासात समोर आले आहे. या प्रकरणी सोलापूर ग्रामीण पोलिसांनी अजयकुमार गौतम चव्हाण (वय ३१, रा. जामगाव, सध्या लऊळ, ता. माढा) याला कर्नाटकातील वाडी रेल्वे स्थानकावरून अटक केली आहे. न्यायालयाने त्याला पाच दिवसांची पोलिस कोठडी सुनावली आहे. (Solapur Crime)

जामगाव येथे २५ ऑगस्टच्या रात्री ते २६ ऑगस्टच्या सकाळदरम्यान ही घटना घडली. अशोक भीमान्ना मुळे (वय ६१) यांच्या घरात चोरी करण्याच्या उद्देशाने आरोपी शिरला होता. मुळे कुटुंबातील एका सदस्याने व्हॉट्सॲप स्टेटसवर तिरुपतीला जाण्याची माहिती ठेवली होती. हे स्टेटस पाहून घरातील सर्वजण बाहेर गेले असल्याचा अंदाज आरोपीने बांधला आणि चोरीचा कट रचला. (Solapur Crime)

पोलिसांच्या तपासानुसार, आरोपीने घराच्या मागील बाजूच्या पाण्याच्या पाइपवरून चढून प्रवेश केला. कुलूप तोडण्यासाठी त्याने यूट्यूबवरील व्हिडिओ पाहून शिकलेली पद्धत वापरल्याचे समोर आले आहे. सिरिंजच्या साहाय्याने कुलूपात पेट्रोल टाकून ते पेटवण्यात आले आणि त्यानंतर कुलूप उघडण्यात आल्याचे पोलिस तपासात निष्पन्न झाले.

घरातील कपाट उचकटताना झालेल्या आवाजाने अशोक मुळे जागे झाले. त्यांनी आरोपीला ओळखल्याने पकडले जाण्याच्या भीतीने आरोपीने त्यांच्या डोक्यावर हातोड्याने वार केले. या हल्ल्यात मुळे यांचा मृत्यू झाला. त्यानंतर आरोपीने घरातून सुमारे २ लाख ४० हजार रुपये किमतीचे सोन्याचे दागिने घेऊन पलायन केले. (Solapur Crime)

दरम्यान, आरोपीला शेअर मार्केटमध्ये सुमारे १५ ते २० लाख रुपयांचे नुकसान झाल्याने तो कर्जबाजारी झाला होता, अशी माहिती पोलिसांनी दिली आहे. गुन्ह्यानंतर मोबाईल बंद करून तो कर्नाटकात पळून गेला. स्थानिक गुन्हे शाखेने सीसीटीव्ही फुटेज आणि तांत्रिक तपासाच्या आधारे त्याचा माग काढला आणि वाडी रेल्वे स्थानकावरून त्याला ताब्यात घेतले. आता पुढील तपास माढा पोलिस करत आहेत. (Solapur Crime)