5 MCD officers suspended : दिल्लीतील सत्य निकेतन दुर्घटनेत ५ MCD अधिकारी निलंबित; मृतांचा आकडा ७ वर, इमारत मालकाविरोधात लूकआऊट नोटीस

नवी दिल्ली : दिल्लीतील सत्य निकेतन भागात ५ मजली इमारत कोसळल्याच्या भीषण दुर्घटनेनंतर दिल्ली सरकारने अत्यंत कडक पाऊल उचलले आहे. प्रशासकीय निष्काळजीपणाचा ठपका ठेवत दिल्ली महानगरपालिकेच्या (MCD) ५ वरिष्ठ अधिकाऱ्यांना तडकाफडकी निलंबित करण्यात आले आहे. दरम्यान, या अपघातातील मृतांची संख्या आता ७ वर पोहोचली असून, ढिगाऱ्याखालून १२ जणांना सुरक्षित बाहेर काढण्यात यश आले आहे.

५ अधिकारी तडकाफडकी निलंबित

या दुर्घटनेनंतर दिल्ली सरकारने महापालिकेवर मोठी कारवाई केली आहे. निलंबित करण्यात आलेल्यांमध्ये दक्षिण क्षेत्राचे (South Zone) उपआयुक्त (Deputy Commissioner), कार्यकारी अभियंता (Executive Engineer), अधीक्षक अभियंता (Superintendent Engineer), सहाय्यक अभियंता (Assistant Engineer) आणि कनिष्ठ अभियंता (Junior Engineer) यांचा समावेश आहे. दुर्घटनेची जबाबदारी निश्चित करत सरकारने निष्काळजीपणा करणाऱ्या अधिकाऱ्यांवर ही कठोर कारवाई केली आहे.

शेजारील धोकादायक इमारत पाडली जाणार

MCD आयुक्त संजीव खिरवार यांनी दिलेल्या माहितीनुसार, या दुर्दैवी घटनेत ७ जणांनी आपला जीव गमावला आहे. कोसळलेल्या इमारतीच्या शेजारी असलेली दुसरी इमारत अत्यंत कमकुवत झाली असून रात्रभर तिला आधार देऊन मजबूत करण्यात आले आहे. येत्या १-२ दिवसांत ही इमारत सुरक्षितपणे पाडली जाईल. महापालिकेने गेल्या तीन महिन्यांत बेकायदेशीर बांधकामांवर ९६० कारवाया केल्या, ४०७ इमारती सील केल्या आणि १५०० हून अधिक इमारतींना नोटीस बजावली आहे, असेही त्यांनी स्पष्ट केले.

फरार इमारत मालकाचा शोध सुरू; लूकआऊट नोटीस जारी

दुर्घटना घडल्यापासून इमारतीचा मालक हरिराम बन्सल फरार झाला असून दिल्ली पोलीस त्याचा तीव्रतेने शोध घेत आहेत. त्याला पकडण्यासाठी पोलिसांची अनेक पथके तैनात करण्यात आली असून तो देशाबाहेर पळून जाऊ नये म्हणून त्याच्याविरोधात लूकआऊट सर्कुलर (Lookout Circular) जारी करण्यात आले आहे. स्थानिक रहिवाशांच्या मते, बन्सल हा हार्डवेअर व्यावसायिक असून या परिसरात त्याची अनेक घरे आणि मालमत्ता आहेत.

युद्धपातळीवर रेस्क्यू ऑपरेशन; ढिगारा हटवण्याचे काम सुरूच

घटनेच्या दुसऱ्या दिवशीही NDRF आणि स्थानिक प्रशासनाकडून बचावकार्य सुरूच आहे. NDRF चे महानिरीक्षक (IG) नरेंद्र सिंह बुंदेला यांनी सांगितले की, ढिगाऱ्याखाली तांत्रिक शोध घेण्याचे काम अविरत सुरू आहे. ढिगाऱ्याचे अनेक थर उपसणे आणि अडकलेल्यांचा शोध घेणे अत्यंत जिकिरीचे काम असल्याने हे रेस्क्यू ऑपरेशन पूर्ण होण्यासाठी संपूर्ण दिवस लागण्याची शक्यता त्यांनी वर्तवली आहे.

कॉलेज विद्यार्थ्याचा दुर्दैवी मृत्यू; सहकाऱ्यांमध्ये शोककळा

या दुर्दैवी अपघातात 'आत्मा राम सनातन धर्म कॉलेज'च्या बी.कॉमच्या 'अर्पित' नावाच्या विद्यार्थ्याचा मृत्यू झाल्याची माहिती कॉलेजचे प्राचार्य प्रा. ज्ञानतोष कुमार झा यांनी दिली. तर इतर जखमी विद्यार्थ्यांवर AIIMS ट्रॉमा सेंटरमध्ये उपचार सुरू आहेत. घटनेनंतर परिसरातील दुकाने बंद झाल्यामुळे कॉलेज प्रशासनाने विद्यार्थ्यांना अन्न, पाणी आणि सुरक्षित राहण्याची व्यवस्था उपलब्ध करून दिली आहे.