Pune Crime : पोलिसांना चकवा देण्यासाठी वेशभूषा बदलली, सोशल मीडियापासूनही स्वतःला दूर ठेवलं, तब्बल चार महिने पोलिसांच्या हातावर तुरी देत फिरत राहिला पण अखेर आईला भेटण्याचा मोह त्याला चांगलाच महागात पडला. आईला भेटण्यासाठी घरी येताच पोलिसांनी सापळा रचून अट्टल गांजा तस्कराला पोलिसांनी बेड्या ठोकल्या आहेत. अजय पोपटराव पाडुळे (Ajay Popatrao Padule)असं अटक करण्यात आलेल्या आरोपीचं नाव आहे.
भारती विद्यापीठ पोलीस ठाण्यात (Bharati Vidyapeeth Police Station) अजय पाडुळे आणि त्याचा साथीदार चारुदत्त चव्हाण यांच्याविरोधात गांजा तस्करीचा गुन्हा दाखल आहे. पोलिसांनी कारवाईदरम्यान चारुदत्त चव्हाण याच्याकडून तब्बल ३५ किलो गांजा जप्त केला होता. मात्र, गुन्हा दाखल होताच मुख्य सूत्रधार असल्याचा आरोप असलेला अजय पाडुळे पसार झाला.
Ujjain : एकीकडे २०२८ च्या सिंहस्थ महाकुंभाची जोरदार तयारी, रस्ता रुंदीकरणासाठी मंदिर हटवण्याचं काम सुरू पण मंदिरातील हनुमानाची मूर्ती हलवण्याची वेळ आली ...
पोलिसांना चकवा देण्यासाठी बदलली वेशभूषा
गुन्हा दाखल झाल्यानंतर पाडुळे शहरातून गायब झाला. मात्र, तो गुपचूप गांजाची विक्री करत असल्याची माहिती पोलिसांना मिळत होती. पोलिसांपासून आपली ओळख लपवण्यासाठी त्याने वेशभूषा बदलली. एवढंच नाही तर पोलिसांना त्याचा डिजिटल माग काढता येऊ नये, यासाठी सोशल मीडिया अकाउंट्सचा वापरही बंद केला. त्यामुळे पाडुळे नेमका कुठे आहे, याचा शोध घेणं पोलिसांसमोर मोठं आव्हान बनलं होतं.
आईला भेटायला आला अन् पोलिसांनी घेरलं
चार महिन्यांपासून फरार असलेल्या पाडुळेबाबत अखेर भारती विद्यापीठ पोलिसांच्या तपास पथकाला गुप्त माहिती मिळाली. अजय आपल्या आईला भेटण्यासाठी हडपसरमधील नवीन म्हाडा वसाहतीत येणार असल्याची माहिती पोलिसांना मिळाली. माहिती मिळताच पोलिसांनी परिसरात सापळा रचला. अजय तिथे पोहोचताच पोलिसांनी त्याला चोहोबाजूंनी घेरलं आणि पळून जाण्याची कोणतीही संधी न देता त्याच्या मुसक्या आवळल्या. चार महिने पोलिसांना गुंगारा देणाऱ्या अजय पाडुळेचा अखेर पोलिसांनी शोध घेतला. या कारवाईमुळे गांजा तस्करी करणाऱ्यांमध्येही खळबळ उडाली असून, या प्रकरणातील पुढील तपास भारती विद्यापीठ पोलीस करत आहेत.
