नवी दिल्ली: बँकेत महत्त्वाचं काम असेल तर ग्राहकांना काही दिवस प्रतीक्षा करावी लागू शकते. बँक कर्मचारी संघटनांनी देशव्यापी एकदिवसीय संपाची हाक दिल्यामुळे आज बँकांच्या नियमित कामकाजावर परिणाम होण्याची शक्यता आहे. यानंतर 12 सप्टेंबरला शनिवार आणि 13 सप्टेंबरला रविवार असल्याने बँकांना नियमित सुट्टी असेल. त्यातच काही राज्यांमध्ये गणेश चतुर्थीनिमित्त पुढील दिवसांनाही बँका बंद राहणार आहेत.
युनायटेड फोरम ऑफ बँक युनियन्स (UFBU) कडून बँकिंग क्षेत्राशी संबंधित विविध मागण्यांसाठी हा संप पुकारण्यात आला आहे. बँक कर्मचाऱ्यांची प्रमुख मागणी म्हणजे आठवड्यातील कामकाज केवळ 5 दिवसांचे असावे. म्हणजेच शनिवार आणि रविवार या दोन्ही दिवशी बँकांना पूर्ण सुट्टी देण्यात यावी, अशी मागणी संघटनांकडून करण्यात आली आहे.
याशिवाय कामगिरीवर आधारित प्रोत्साहन योजनेचा आढावा घेऊन त्यातील त्रुटी दूर कराव्यात, पेन्शनमध्ये करण्यात आलेल्या सुधारणांची अंमलबजावणी करावी आणि कर्मचाऱ्यांच्या आरोग्य विम्याशी संबंधित तरतुदी लागू कराव्यात, अशा मागण्या बँक कर्मचारी संघटनांनी केल्या आहेत.
Gold Rate Today : अमेरिकेतून आलेल्या महागाईच्या आकडेवारीचा परिणाम कमोडिटी मार्केटपासून सराफा बाजारापर्यंत दिसून येत आहे. सोन्या-चांदीच्या दरात गेल्या दोन ...
मागण्या मान्य न झाल्यास 28 ते 30 सप्टेंबरदरम्यान 3 दिवसांचा देशव्यापी संप पुकारण्याचा इशारा देण्यात आला आहे. त्यानंतरही प्रश्न सुटला नाही तर 26 ऑक्टोबर 2026 पासून बेमुदत संप सुरू करण्याचा इशाराही संघटनांनी दिला आहे.
दरम्यान, बँकांच्या शाखा बंद असल्या तरी ग्राहकांना ऑनलाइन बँकिंगच्या माध्यमातून अनेक आर्थिक व्यवहार करता येणार आहेत. IMPS, NEFT, RTGS आणि UPI सेवा सुरू राहण्याची शक्यता आहे. त्यामुळे GPay, PhonePe आणि Paytm सारख्या माध्यमातून पैसे पाठवता येतील.
याशिवाय ATM मधून पैसे काढणे, ऑनलाइन वीज, पाणी आणि गॅस बिल भरणे तसेच मोबाइल रिचार्ज करण्यासाठी नेट बँकिंग किंवा बँकेच्या मोबाइल अॅपचा वापर करता येईल. SBI आणि पंजाब नॅशनल बँकेनेही ग्राहकांना संपाबाबत माहिती दिली आहे.