Baramati Crime : बारामतीत ३० वर्षीय महिलेची निर्घृण हत्या; बेडरूममध्ये रक्ताच्या थारोळ्यात सापडला मृतदेह

बारामती : बारामती तालुक्यातील पणदरे गावात ३० वर्षीय विवाहितेची निर्घृण हत्या झाल्याची धक्कादायक घटना समोर आली आहे. वैशाली तानाजी पवार (वय ३०, रा. खडकआळी, पणदरे) असे मृत महिलेचे नाव आहे. शनिवारी (१२ सप्टेंबर २०२६) सायंकाळी ही घटना उघडकीस आली. पोलिसांच्या प्राथमिक माहितीनुसार, सायंकाळी पावणे आठच्या सुमारास अज्ञात व्यक्तीने घरात प्रवेश करून बेडरूममध्ये वैशाली पवार यांच्यावर हल्ला केला. त्यांच्या डोक्यावर आणि चेहऱ्यावर धारदार शस्त्राने वार केल्यानंतर टॉवेलने गळा आवळून त्यांची हत्या केल्याचे समोर आले आहे. (Baramati Crime)



या प्रकरणी मृत महिलेची सासू रंजना लक्ष्मण पवार यांनी माळेगाव पोलीस ठाण्यात फिर्याद दाखल केली आहे. त्यानुसार अज्ञात आरोपीविरोधात भारतीय न्याय संहितेच्या (BNS) कलम १०३(१) अंतर्गत खुनाचा गुन्हा नोंदवण्यात आला आहे. घटनेची माहिती मिळताच उपविभागीय पोलीस अधिकारी कदम आणि सहाय्यक पोलीस निरीक्षक कुलदीप संकपाळ यांनी घटनास्थळी पोहोचून पाहणी केली. हत्येमागील नेमके कारण अद्याप स्पष्ट झालेले नसून, आरोपीची ओळख पटवून त्याला शोधण्यासाठी पोलिसांकडून तपास सुरू आहे. (Baramati Crime)