Tata Steel : पोर्ट टॅलबोट प्रकल्पाचा खर्च वाढला; 'टाटा स्टील'ची यूके सरकारकडे अतिरिक्त निधीची मागणी

मुंबई : ब्रिटनमधील पोर्ट टॅलबोट स्टील प्लांटच्या परिवर्तन प्रकल्पाला होत असलेल्या विलंबामुळे टाटा स्टीलने यूके सरकारकडे अतिरिक्त आर्थिक मदतीची मागणी केल्याचे वृत्त आहे. स्काय न्यूजच्या वृत्तानुसार, कंपनीने अलीकडेच ब्रिटनच्या संबंधित सरकारी विभागाशी नव्या आर्थिक मदत पॅकेजबाबत चर्चा केली आहे. या अतिरिक्त मदतीची नेमकी रक्कम अद्याप स्पष्ट झालेली नसली, तरी ती शेकडो दशलक्ष पौंडांपर्यंत असू शकते, असे उद्योग क्षेत्रातील सूत्रांच्या हवाल्याने वृत्तात म्हटले आहे. (Tata Steel)

आधीच मिळाले आहेत ५०० दशलक्ष पौंड

पोर्ट टॅलबोट प्लांटमध्ये पारंपरिक ब्लास्ट फर्नेसऐवजी इलेक्ट्रिक आर्क फर्नेस (EAF) उभारण्यासाठी टाटा स्टीलने सुमारे १.२५ अब्ज पौंडांच्या गुंतवणुकीची योजना आखली आहे. या प्रकल्पासाठी यूके सरकारने ५०० दशलक्ष पौंडांच्या अनुदानाला मंजुरी दिली आहे. या परिवर्तनाचा उद्देश ब्रिटनमधील पोलाद उत्पादन अधिक कमी-कार्बन पद्धतीकडे नेणे हा आहे. (Tata Steel)

EAF सुरू होण्यास विलंब

नवीन इलेक्ट्रिक आर्क फर्नेस आधी २०२८च्या सुरुवातीला कार्यान्वित होण्याचे नियोजन होते. मात्र, वीज ग्रीड कनेक्शनमध्ये झालेल्या विलंबामुळे प्रकल्पाची वेळ पुढे गेली असून आता EAF २०२८च्या अखेरीस किंवा २०२९च्या सुरुवातीला सुरू होण्याची शक्यता असल्याचे समोर आले आहे.

या विलंबामुळे बांधकामाशी संबंधित खर्च वाढण्याबरोबरच नियोजित कालावधीत होऊ न शकणाऱ्या विक्रीमुळे कंपनीच्या खर्चात आणखी वाढ होण्याची शक्यता आहे. त्यामुळे टाटा स्टीलने अतिरिक्त सरकारी मदतीसाठी चर्चा सुरू केल्याचे वृत्त आहे. (Tata Steel)

ब्लास्ट फर्नेस बंद झाल्यानंतर मोठा बदल

पोर्ट टॅलबोटमधील शेवटचा ब्लास्ट फर्नेस २०२४ मध्ये बंद झाला. या परिवर्तन प्रक्रियेत सुमारे २,५०० नोकऱ्यांवर परिणाम झाला आहे. मात्र, यूके सरकार आणि टाटा स्टीलच्या करारानुसार, नवीन EAF प्रकल्पामुळे देशभरात सुमारे ५,००० स्टीलमेकिंग नोकऱ्या सुरक्षित ठेवण्याचे उद्दिष्ट आहे. (Tata Steel)

स्वस्त आयातीचा पोलाद उद्योगावर दबाव

दरम्यान, ब्रिटनच्या पोलाद उद्योगासमोर स्वस्त आयातीचे आव्हानही कायम आहे. टाटा स्टीलने यापूर्वीही यूकेमधील आपल्या व्यवसायाच्या आर्थिक व्यवहार्यतेबाबत चिंता व्यक्त केली आहे. भारतासह इतर देशांमधून होणाऱ्या पोलाद आयातीमुळे ब्रिटनमधील उत्पादकांवर किंमतीचा दबाव वाढत असल्याचे उद्योग क्षेत्रातील संघटनांनीही म्हटले आहे. (Tata Steel)

ब्रिटनच्या पोलाद उद्योगासाठी महत्त्वाचा प्रकल्प

पोर्ट टॅलबोटमधील EAF प्रकल्प हा ब्रिटनच्या पोलाद उद्योगाच्या भविष्यासाठी महत्त्वाचा मानला जात आहे. इलेक्ट्रिक आर्क फर्नेसच्या माध्यमातून स्क्रॅप स्टील वितळवून पोलाद तयार केले जाते आणि पारंपरिक कोळसा-आधारित ब्लास्ट फर्नेसच्या तुलनेत कार्बन उत्सर्जन कमी करण्याच्या दिशेने हा बदल महत्त्वाचा आहे. यूके सरकारच्या माहितीनुसार, या प्रकल्पामुळे देशाच्या एकूण कार्बन उत्सर्जनातही घट होण्यास मदत होणार आहे.

आता प्रकल्पाला होत असलेला विलंब, वाढता खर्च आणि ब्रिटनच्या पोलाद क्षेत्रावरील आयातीचा दबाव पाहता टाटा स्टीलच्या अतिरिक्त आर्थिक मदतीच्या मागणीवर यूके सरकार काय निर्णय घेते, याकडे लक्ष लागले आहे. (Tata Steel)