Maharashtra Weather : मान्सूनच्या परतीच्या काळात पावसाचा जोर वाढणार; महाराष्ट्रासह 13 राज्यांना हवामान विभागाचा इशारा

मुंबई : यंदा मान्सूनच्या सुरुवातीच्या काळात पावसाचे प्रमाण कमी राहिल्यानंतर आता शेवटच्या टप्प्यात पावसाने पुन्हा जोर धरला आहे. महाराष्ट्रासह देशातील अनेक भागांत सध्या पावसाची स्थिती आहे. बंगालच्या उपसागरात तयार झालेल्या कमी दाबाच्या क्षेत्रामुळे पुढील काही दिवसांत पावसाचा जोर आणखी वाढण्याची शक्यता आहे. या पार्श्वभूमीवर हवामान विभागाने 13 राज्यांना पावसाचा इशारा दिला आहे. ( Maharashtra Weather)

हवामान विभागाच्या अंदाजानुसार, पुढील 2 ते 3 दिवसांत पंजाब, हरियाणा, दिल्ली, राजस्थान, हिमाचल प्रदेश आणि पश्चिम उत्तर प्रदेशातील काही भागांतून मान्सूनच्या माघारीसाठी पोषक वातावरण तयार होण्याची शक्यता आहे. मात्र, बंगालच्या उपसागरातील कमी दाबाच्या क्षेत्रामुळे पूर्व आणि मध्य भारतातील काही राज्यांमध्ये पावसाचा जोर वाढू शकतो.

हे कमी दाबाचे क्षेत्र अधिक तीव्र होऊन डीप डिप्रेशनमध्ये बदलण्याची शक्यता आहे. त्यामुळे काही भागांत मुसळधार ते अतिमुसळधार पाऊस पडू शकतो. किनारपट्टी भागात वेगवान वारे वाहण्याची शक्यता असून समुद्राची स्थितीही खराब राहण्याचा अंदाज आहे. त्यामुळे मच्छीमारांनी समुद्रात न जाण्याचा सल्ला देण्यात आला आहे.

ओडिशा आणि आंध्र प्रदेशच्या किनारपट्टी भागावर या हवामान प्रणालीचा परिणाम जाणवण्याची शक्यता आहे. ओडिशामध्ये 23 ते 24 सप्टेंबरदरम्यान, तर छत्तीसगड आणि तेलंगणामध्येही काही भागांत मुसळधार ते अतिमुसळधार पावसाचा अंदाज आहे. काही ठिकाणी पावसामुळे स्थानिक पातळीवर पूरस्थिती निर्माण होण्याची शक्यता आहे. ( Monsoon)

दरम्यान, 23 सप्टेंबर रोजी केरळ, राजस्थान, झारखंड, ओडिशा, आंध्र प्रदेश, छत्तीसगड, तेलंगणा, सिक्कीम, महाराष्ट्र, गुजरात, पश्चिम बंगाल, आसाम आणि मेघालय या 13 राज्यांमध्ये पावसाची शक्यता आहे.

महाराष्ट्रात विदर्भ, मराठवाडा आणि कोकणातील काही भागांत विजांच्या कडकडाटासह जोरदार पावसाचा इशारा देण्यात आला आहे. धाराशिव, लातूर, नांदेड, यवतमाळ, वर्धा, नागपूर, चंद्रपूर, गोंदिया आणि गडचिरोली येथे पावसाचा जोर वाढू शकतो. रायगड, रत्नागिरी आणि सिंधुदुर्गमध्येही जोरदार पावसाची शक्यता आहे. नाशिक, पुणे, सातारा, सांगली, कोल्हापूर, अहमदनगर आणि सोलापूरमध्ये काही ठिकाणी विजांच्या कडकडाटासह पाऊस पडू शकतो. ( Heavy rainfall)