टेलिकॉम क्षेत्रातील दिग्गज कंपनी Airtel ने आपल्या पोस्टपेड ग्राहकांसाठी महत्त्वाचा निर्णय घेतला आहे. कंपनीने आपल्या विविध पोस्टपेड प्लॅन्सच्या दरांमध्ये ५० रुपयांपर्यंत वाढ करण्याची घोषणा केली आहे. मात्र, या दरवाढीसोबतच ग्राहकांसाठी एक दिलासादायक ऑफरही आणली आहे. आता एयरटेलच्या सर्व पोस्टपेड युजर्सना दरवर्षी एक आंतरराष्ट्रीय प्रवास (International Roaming) अगदी मोफत मिळणार आहे. हे नवीन सुधारित दर ८ ऑक्टोबर २०२६ पासून लागू होणार आहेत. कंपनीने दिलेल्या माहितीनुसार, सध्याच्या पोस्टपेड युजर्सना येत्या एका महिन्यात त्यांच्या सध्याच्या रिचार्जच्या जवळ असलेल्या नवीन प्लॅनमध्ये आपोआप शिफ्ट केले जाईल. कंपनीच्या अधिकाऱ्याने स्पष्ट केले की, या मोफत आंतरराष्ट्रीय रोमिंगची किंमत साधारणपणे २,००० रुपयांच्या घरात आहे.
वर्षभरात ५ दिवसांचा इंटरनॅशनल रोमिंग पॅक अगदी मोफत
कंपनीकडून मिळणाऱ्या या मोफत रोमिंग पॅकची वैधता (Validity) ५ दिवसांची असेल. यामध्ये ग्राहकांना 5GB डेटा, ६० मिनिटांचा कॉलिंग वेळ आणि २५ आउटगोइंग SMS मोफत मिळतील. विशेष म्हणजे, इनकमिंग मॅसेजसाठी कोणताही अतिरिक्त चार्ज आकारला जाणार नाही. ग्राहक आपल्या गरजेनुसार वर्षभरात कधीही हा रोमिंग पॅक ॲक्टिव्हेट करू शकतात. ज्यांच्याकडे फॅमिली पोस्टपेड प्लॅन आहे, त्यांनाही याचा मोठा फायदा होणार आहे; कारण अकाउंटशी जोडलेल्या प्रत्येक सदस्याला (SIM Card) दरवर्षी ही मोफत आंतरराष्ट्रीय ट्रिपची सुविधा दिली जाईल.
एयरटेलच्या नवीन पोस्टपेड प्लॅन्सचे स्वरूप आणि मिळणारे फायदे :
₹४९९ चा प्लॅन (इंडिव्हिज्युअल) : यामध्ये एका सिम कार्डवर अनलिमिटेड कॉलिंग आणि डेटासह स्पॅम व फ्रॉड प्रोटेक्शन, Xstream Play प्रीमियम आणि Google One चे सब्सक्रिप्शन मिळते.
₹७४९ चा प्लॅन (फॅमिली - २ सिम) : यामध्ये दोन सिम कार्ड्स मिळतात. सोबतच Amazon Prime, JioHotstar, Xstream Play Premium आणि Google One चा लाभ मिळतो.
₹१,०४९ चा प्लॅन (फॅमिली - ३ सिम) : तीन सिम कार्ड्स असलेल्या या प्लॅनमध्ये Apple iCloud+, Apple Music, Amazon Prime, JioHotstar आणि इतर ओटीटी ॲप्सचा ॲक्सेस मिळतो.
₹१,२४९ चा प्लॅन (फॅमिली - ४ सिम) : चार सिम कार्ड्सचा समावेश असलेल्या या प्लॅनमध्ये वरील सर्व प्रीमियम सुविधा उपलब्ध आहेत.
₹१,४४९ चा प्लॅन (फॅमिली - ४ सिम + नेटफ्लिक्स) : यामध्ये चार सिम कार्ड्ससोबत Netflix Basic चे फ्री सब्सक्रिप्शन जोडण्यात आले आहे.
₹१,७९९ चा प्लॅन (फॅमिली - ५ सिम) : पाच सिम कार्ड्सच्या या सर्वात मोठ्या प्लॅनमध्ये Netflix Standard सह Apple iCloud+, Apple Music, Amazon Prime आणि इतर सर्व प्रमुख OTT प्लॅटफॉर्म्सचा लाभ मिळतो.
(टीप: वरील सर्व प्लॅन्समध्ये दरवर्षी प्रति सिम १ मोफत इंटरनॅशनल रोमिंग ट्रिप समाविष्ट आहे.)
५G स्पीड आणि एंटरटेनमेंटचे अतिरिक्त फायदे
नवीन पोस्टपेड प्लॅन्समध्ये केवळ रोमिंगच नाही, तर ५G वर फास्ट-लेन तंत्रज्ञान आणि सायबर सुरक्षेसाठी फ्रॉड प्रोटेक्शन सिस्टीम देण्यात आली आहे. याशिवाय, 'एयरटेल पोस्टपेड ॲडव्हान्टेज क्लब'च्या माध्यमातून ग्राहकांना कॉमेडी शो, चित्रपट प्रीमियर आणि संगीतमय मैफिलींसारख्या (Concerts) व्हीआयपी इव्हेंट्सचे विशेष ॲक्सेस व डिस्काउंट्स देखील मिळतील.
टेलिकॉम कंपन्यांमधील स्पर्धा रंगात
Vodafone Idea (Vi) देखील आपल्या काही निवडक प्लॅन्सवर मोफत आंतरराष्ट्रीय रोमिंग देत आहे. त्याला थेट टक्कर देण्यासाठी आणि प्रीमियम ग्राहकांना आकर्षित करण्यासाठी एयरटेलने डेटा, सुरक्षितता, मनोरंजन आणि आंतरराष्ट्रीय प्रवास या सर्वांचे एक उत्तम पॅकेज तयार केले आहे.
नवीन Airtel Postpaid प्लॅन कसा मिळवायचा?
विद्यमान ग्राहक: एयरटेलचे सध्याचे प्रीपेड किंवा पोस्टपेड युजर्स Airtel Thanks App वरून थेट आपला प्लॅन अपग्रेड करू शकतात किंवा जवळच्या एयरटेल स्टोअरला भेट देऊ शकतात.
इतर युजर्स: जर तुम्ही दुसऱ्या कंपनीचे सिम वापरत असाल, तर पोर्टिंग (MNP) द्वारे एयरटेल पोस्टपेडमध्ये शिफ्ट होण्यासाठी ॲपवरून किंवा स्टोअरमध्ये जाऊन सहज अर्ज करू शकता.