मुंबई : कोणतीही वैद्यकीय पदवी किंवा महाराष्ट्र मेडिकल कौन्सिलची नोंदणी नसतानाही डॉक्टर म्हणून प्रॅक्टिस करणाऱ्या 10 जणांवर मुंबई क्राईम ब्रँचने कारवाई केली आहे. गुप्तरोगांसह विविध आजारांवर उपचार करण्याचा दावा करत हे जण मुंबईतील वेगवेगळ्या भागांत क्लिनिक चालवत होते. क्राईम ब्रँच युनिट 7 आणि मुंबई महापालिकेच्या वैद्यकीय अधिकाऱ्यांनी संयुक्तपणे ही कारवाई केली.
भांडूप, मानखुर्द, कुर्ला, जोगेश्वरी, बोरीवली आणि दहिसर परिसरातील काही क्लिनिकवर छापे टाकण्यात आले. या ठिकाणी रुग्णांवर विविध पद्धतींनी उपचार केले जात असल्याचे तपासात समोर आले. अ‍ॅलोपॅथी, आयुर्वेदिक आणि युनानी पद्धतीची औषधे वापरली जात होती. उपचारासाठी रुग्णांकडून पैसे घेतले जात असल्याचेही पोलिसांनी सांगितले.
कारवाईदरम्यान काही क्लिनिकमध्ये मुदत संपलेली आयुर्वेदिक आणि युनानी औषधे आढळून आली. तसेच औषधांची विक्री केली जात असल्याचेही समोर आले. छापेमारीत औषधांच्या बाटल्या, सिरिंज, अँटिबायोटिक गोळ्या आणि इतर वैद्यकीय साहित्य जप्त करण्यात आले आहे. या कारवाईत सुमारे 2 लाख 20 हजार रुपयांचा मुद्देमाल पोलिसांनी ताब्यात घेतला आहे.
या प्रकरणी भांडूप पोलीस ठाण्यात महाराष्ट्र मेडिकल प्रॅक्टिशनर्स ॲक्ट, 1961 अंतर्गत गुन्हा दाखल करण्यात आला आहे. अटक करण्यात आलेल्या व्यक्तींची चौकशी सुरू असून त्यांनी आतापर्यंत किती रुग्णांवर उपचार केले आणि आणखी कुठे अशा प्रकारची क्लिनिक सुरू आहेत का, याचा तपास केला जात आहे.
🔸Mumbai Crime Branch Takes Action Against Quacks!
Unit 7 of the Mumbai Crime Branch took action against 10 quacks allegedly practising medicine without valid medical degrees or registration. 🔸बोगस डॉक्टरांवर मुंबई गुन्हे शाखेची कारवाई वैद्यकीय क्षेत्रातील कोणतीही वैध पदवी अथवा नोंदणी नसतानाही रुग्णांवर बेकायदेशीर उपचार करणाऱ्या १० बोगस डॉक्टरांवर मुंबई गुन्हे शाखा, कक्ष ७ यांनी कारवाई केली. #MumbaiPolice4All — मुंबई पोलीस Mumbai Police (@MumbaiPolice) October 6, 2026
पोलिसांच्या कारवाईत भांडूपमधील संतोष हेल्थ क्लिनिक, विनायक हेल्थ क्लिनिक, जोगेश्वरीतील हमदम दवाखाना आणि कोहिनूर दवाखाना, बोरीवलीतील अंकुश आयुर्वेदिक दवाखाना, दहिसरमधील दीपक हर्बल हेल्थ केअर क्लिनिक आणि मानखुर्दमधील समर आयुर्वेदिक दवाखान्यावर कारवाई करण्यात आली.
या कारवाईमुळे वैद्यकीय पदवी आणि अधिकृत नोंदणी नसताना उपचार करणाऱ्यांविरोधात पोलिसांनी कारवाईचा इशारा दिला आहे. नागरिकांनी उपचार घेण्यापूर्वी संबंधित डॉक्टरची वैद्यकीय पदवी आणि नोंदणी तपासावी, असे आवाहन करण्यात आले आहे.
