मोरबी : गुजरात राज्यातील मोरबी जिल्ह्यात राष्ट्रीय महामार्गावर एक अतिशय भयानक आणि अंगावर काटा आणणारी अपघाताची घटना घडली आहे. माळिया-कच्छ नॅशनल हायवेवरून मेंढ्या आणि शेळ्यांचा कळप रस्ता ओलांडत असताना, एका भरधाव वेगातील अनियंत्रित ट्रकने त्यांना चिरडले. या दुर्दैवी घटनेत तब्बल २३ मेंढ्या आणि २ शेळ्यांचा जागीच तडफडून मृत्यू झाला, तर सुमारे ३० मेंढ्या गंभीर जखमी झाल्या आहेत.
सीसीटीव्ही फुटेज आले समोर
माळिया पोलीस ठाण्याच्या हद्दीत घडलेल्या या अपघाताचा अंगावर काटा आणणारा सीसीटीव्ही व्हिडिओ सध्या समोर आला असून तो सोशल मीडियावर प्रचंड व्हायरल होत आहे. कच्छ जिल्ह्यातील भचाऊ तालुक्यातील जंगी गावचे रहिवासी असलेले विभाभाई रबारी हे आपल्या मेंढ्या आणि शेळ्यांना घेऊन रस्त्याने चालले होते. त्याच वेळी महामार्गावरून येणाऱ्या एका भरधाव मालवाहू ट्रकने या निष्पाप प्राण्यांच्या कळपाला जोरदार धडक दिली.
चालकाविरोधात गुन्हा दाखल
या प्रकरणी पशुपालक विभाभाई यांनी माळिया पोलीस ठाण्यात फिर्याद दिली आहे. ट्रकचालक उस्मान मोहम्मद रमजान नाइच याने अत्यंत बेदरकारपणे आणि वेगाने वाहन चालवून जनावरांना चिरडल्याचा आरोप तक्रारीत करण्यात आला आहे. धडक इतकी भीषण होती की २५ जनावरांचा जागीच प्राण गेला, तर ३० जनावरे रक्ताच्या थारोळ्यात पडली. घटनास्थळावरील दृश्ये अत्यंत विदारक आणि हतबल करणारी होती.
पशुपालकाचे ६५ हजारांचे नुकसान; पोलिसांकडून तपास सुरू
पोलीस आता सीसीटीव्ही फुटेज आणि मिळालेल्या तक्रारीच्या आधारे ट्रकचालकावर कायदेशीर कारवाई करत आहेत. या अपघातामुळे आपले सुमारे ६० ते ६५ हजार रुपयांचे मोठे आर्थिक नुकसान झाल्याचे विभाभाई रबारी यांनी सांगितले. केवळ आर्थिक नुकसानच नाही, तर ही जनावरे त्यांच्यासाठी रोजगाराचे मुख्य साधन आणि कुटुंबातील सदस्यांसारखी होती, त्यामुळे रबारी कुटुंबावर दुःखाचा डोंगर कोसळला आहे.
