स्मृती मंधानाच्या नेतृत्वात भारतीय संघाचा पहिला मालिका विजय, झिम्बाब्वेला नऊ विकेट्सने केलं पराभूत

मुंबई: भारत आणि झिम्बाब्वे यांच्यात तीन सामन्यांची टी 20 मालिका सुरू आहे. या मालिकेतील सलग 2 सामन्यांत भारताने विजय मिळवून ही मालिका खिशात टाकली. स्मृती मंधानाच्या नेतृत्वात भारताचा हा पहिला विजय आहे. नुकतीच तिने हरमनप्रीत कौर कडून भारतीय महिला टीमचे कर्णधार पदाची सुत्रे हाती घेतले आहे. स्मृतीने कर्णधार पदाची सुत्रे हाती घेतल्यानंतर पहिल्याच मालिकेत भारताने दणदणीत विजय मिळवला.

दुसऱ्या टी 20 सामन्यात नाणे फेकीचा कौल, झिम्बाब्वेच्या बाजूने लागला आणि त्यांनी प्रथम फलंदाजी स्विकारली. पण, त्यांचा हा निर्णय चुकीचा ठरला. झिम्बाब्वेने 20 षटकात 8 गडी गमवून 102 धावा केल्या आणि विजयासाठी 103 धावांचं आवाहन ठेवलं. हे आवाहन भारताने एक गडी गमावता पूर्ण केलं. शेफाली वर्मा आणि कर्णधार स्मृती मंधानाच्या जबरदस्त खेळीने काही वेळातच टी 20 क्रिकेट सामना भारताने जिंकला.

झिम्बाब्वेचा डाव

झिम्बाब्वेकडून चीपो मुगेरी-तिरिपानोने सर्वाधिक 32 चेंडूंत 34 धावा केल्या, तर कर्णधार जोसेफीन नकोमोने नाबाद 27 धावांचे योगदान देऊन संघाला शंभरचा टप्पा ओलांडून दिला. भारताकडून निकी प्रसादने अवघ्या 2 षटकांत 7 धावा देऊन 2 महत्त्वाचे बळी घेतले, तर दीप्ती शर्मा, क्रांती गौड, श्री चरणी आणि नंदनी शर्मा यांनी प्रत्येकी 1-1 गडी बाद केला. भारतीय संघाने उत्कृष्ट क्षेत्ररक्षण करत झिम्बाब्वेच्या खेळाडूंना धावबाद देखील केले. भारतीय गोलंदाजांच्या अचूक माऱ्यासमोर त्यांच्या फलंदाजांना वेगाने धावा करता आल्या नाहीत. त्यामुळे त्यांना निर्धारित 20 षटकांत 102 धावांवरच समाधान मानावे लागले.

टीम इंडियाची दमदार खेळी

झिम्बाब्वेने दिलेल्या 103 धावांच्या लक्ष्याचा पाठलाग करताना भारताच्या सलामीवीरांनी उत्कृष्ट फलंदाजी केली. धडाकेबाज फलंदाज शफाली वर्माने अवघ्या 25 चेंडूंत 6  चौकार आणि 4 षटकारांच्या मदतीने 55 धावांची वादळी अर्धशतकीय खेळी केली. तर दुसरीकडे, उपकर्णधार स्मृती मंधानाने 25 चेंडूंत 6 चौकार आणि 2 षटकारांसह नाबाद 47 धावा करत संघाला सहज विजय मिळवून दिला. शफाली वर्मा बाद झाल्यानंतर अनुष्का शर्मा फलंदाजीला आली. ती 1 धाव करून नाबाद राहिली. 9 व्या षटकातच 1 बाद 103 धावांवर पोहोचवून विजय निश्चित केला.

सामन्यातील विक्रम

या ऐतिहासिक विजयामुळे भारत महिला संघाने 2026 या कॅलेंडर वर्षात आपला 17 वा टी-20 विजय नोंदवून एका वर्षात सर्वाधिक सामने जिंकण्याचा स्वतःचा नवा विक्रम प्रस्थापित केला. याशिवाय, 100 पेक्षा जास्त धावांच्या आव्हानाचा पाठलाग करताना 67 चेंडू शिल्लक ठेवून मिळवलेला हा विजय महिला टी-20 क्रिकेटच्या इतिहासातील सर्वोच्च कामगिरी ठरला आहे. फलंदाजीमध्ये भारतीय खेळाडू शफाली वर्माने 2026 या एकाच वर्षात सर्वाधिक 9 अर्धशतके (50+ धावा) आणि 922 धावा फटकावून जागतिक क्रिकेटमध्ये अव्वल स्थान पटकावत अनेक दिग्गज खेळाडूंना मागे टाकले आहे.