ओटावा (कॅनडा): कॅनडाच्या अल्बर्टा प्रांतातील कॅनेडियन फोर्सेस बेस वेनराइट या महत्त्वाच्या लष्करी तळावर शनिवारी प्रशिक्षण सरावादरम्यान अचानक लागलेल्या भीषण आगीत चार सैनिकांचा दुर्दैवी मृत्यू झाला असून, 39 जण गंभीर जखमी झाले आहेत. या दुर्घटनेमुळे कॅनडासह संपूर्ण आंतरराष्ट्रीय वर्तुळात हळहळ व्यक्त होत आहे. कॅनेडियन पंतप्रधान मार्क कार्नी यांनी या घटनेला दुजोरा देत सविस्तर चौकशीचे आदेश दिले आहेत. प्रशासनाकडून जखमींवर तातडीने उपचार सुरू असून, मृतांच्या कुटुंबीयांप्रती शोकसंवेदना व्यक्त केली जात आहे.
प्रशिक्षण सराव ठरला जीवघेणा
शनिवारी कॅनेडियन फोर्सेस बेस वेनराइट येथे नियमित लष्करी प्रशिक्षण सराव सुरू असताना ही दुर्दैवी दुर्घटना घडली. प्रथम कॅनेडियन डिव्हिजनचे कमांडर मेजर जनरल वेड रटलँड यांनी दिलेल्या माहितीनुसार, सरावादरम्यान गवताला अचानक आग लागली आणि वाऱ्यामुळे ती वेगाने पसरली. लष्करी तळ आणि आसपासच्या परिसराला या आगीने अवघ्या काही वेळातच विळखा घातला. प्राथमिक तपास सुरू असून आग नेमकी कशामुळे पसरली, याचा शोध घेतला जात आहे. अग्निशामक दलाने अथक प्रयत्न करून अखेर आगीवर पूर्णपणे नियंत्रण मिळवले आहे.
39 जण रुग्णालयात दाखल, अनेकांची प्रकृती चिंताजनक
अल्बर्टाच्या प्रीमियर डॅनियल स्मिथ यांनी स्पष्ट केले की, या दुर्घटनेत 39 जण अद्याप रुग्णालयात उपचार घेत आहेत. त्यापैकी किमान 19 जणांची प्रकृती अत्यंत गंभीर आहे. सर्व जखमी सैनिकांना वेनराइट तळावरून तातडीने अल्बर्टाच्या चार वेगवेगळ्या विशेष रुग्णालयांमध्ये हलवण्यात आले असून तज्ज्ञ डॉक्टरांच्या देखरेखीखाली त्यांच्यावर उपचार सुरू आहेत. सार्जंट मॉर्गन वोंग, शॉन फॅरेल, एडन गोल्डिंग आणि हेडन लाइकेमार्क अशी या दुर्दैवी दुर्घटनेत प्राण गमावलेल्या चार वीर सैनिकांची नावे आहेत. त्यांच्या निधनाने लष्करामध्ये शोककळा पसरली आहे.
वॉशिंग्टन : अमेरिकेचे राष्ट्राध्यक्ष डोनाल्ड ट्रम्प यांच्या प्रशासनात व्हाइट हाऊसच्या प्रेस सेक्रेटरी म्हणून नियुक्त झालेल्या केटी झकारिया यांचा ...
पंतप्रधान आणि संरक्षण मंत्र्यांकडून तीव्र शोक
कॅनडाचे पंतप्रधान मार्क कार्नी यांनी रविवारी पत्रकार परिषदेत या वृत्ताला अधिकृत दुजोरा दिला. ही घटना अत्यंत वेदनादायक असून त्यांनी या संपूर्ण प्रकरणाचा सविस्तर अहवाल मागवला आहे. दरम्यान, संरक्षणमंत्री डेव्हिड मॅकगिन्टी यांनी दुःख व्यक्त करताना सांगितले की, “लष्करी तळावर घडलेल्या या भीषण घटनेत आपण आपले काही शूर जवान गमावले आहेत आणि अनेकजण मृत्यूशी झुंजत आहेत.” या कठीण प्रसंगी सरकार जखमी सैनिकांच्या पाठीशी खंबीरपणे उभे असून, सर्वतोपरी मदत केली जात असल्याचे त्यांनी स्पष्ट केले.
