नाशिक : सण-उत्सवांच्या पार्श्वभूमीवर अन्नपदार्थांच्या गुणवत्तेवर लक्ष ठेवण्यासाठी अन्न व औषध प्रशासनाने (FDA) नाशिकमध्ये मोठी कारवाई केली आहे. द्वारका परिसरातील ‘मे. सोमेश्वर घरगुती मसाले’ या आस्थापनेवर छापा टाकून तब्बल २ हजार २३० किलो मसाल्यांचा साठा जप्त करण्यात आला. जप्त केलेल्या मालाची एकूण बाजारभावानुसार किंमत ११ लाख ८६ हजार २०० रुपये असल्याची माहिती प्रशासनाने दिली. सण-उत्सव विशेष मोहीम २०२६ अंतर्गत ही कारवाई करण्यात आली. मसाल्यांच्या पॅकिंगवर लेबलिंगविषयक नियमांचे उल्लंघन आढळल्याने तसेच उत्पादनांच्या गुणवत्तेबाबत संशय निर्माण झाल्याने प्रशासनाने हा साठा ताब्यात घेतला.
द्वारका परिसरातील मसाला कारखान्यावर छापा
अन्न सुरक्षा आयुक्त तुकाराम मुंढे, सहआयुक्त मंगेश माने आणि सहायक आयुक्त (अन्न) व्ही. पी. धवड यांच्या मार्गदर्शनाखाली २२ ऑक्टोबर रोजी ही कारवाई करण्यात आली. नाशिकमधील द्वारका परिसरातील तिगरानिया औद्योगिक क्षेत्रात, प्लॉट क्रमांक ५६, सर्व्हे क्रमांक ४०२/४०२/१ येथे असलेल्या ‘मे. सोमेश्वर घरगुती मसाले’ या आस्थापनेची तपासणी करण्यात आली. या तपासणीदरम्यान विविध मसाल्यांच्या पॅकिंगवर लेबलिंगसंबंधी नियमांचे पालन केले नसल्याचे, म्हणजेच चुकीच्या लेबलिंगचे प्रकार आढळल्याचे प्रशासनाने नमूद केले. याशिवाय, काही अन्नपदार्थ निर्धारित गुणवत्ता निकषांनुसार आहेत की नाहीत, याबाबत संशय व्यक्त करण्यात आला. त्यामुळे संबंधित मसाल्यांचा साठा जप्त करण्याची कारवाई करण्यात आली.
नाशिक : नाशिक जिल्हा परिषदेचे मुख्य कार्यकारी अधिकारी ओमकार पवार यांनी त्र्यंबकेश्वर तालुक्यातील प्रशासकीय कामकाजाचा आढावा घेतल्यानंतर ...
कोणते मसाले जप्त? जाणून घ्या संपूर्ण यादी
अन्न व औषध प्रशासनाने जप्त केलेल्या मसाल्यांचा तपशील पुढीलप्रमाणे आहे.
मसाल्याचा प्रकार| जप्त साठा| अंदाजित किंमत
हळद पावडर| ३३८ किलो| ₹२,०२,८००
कांदा-लसूण मसाला| ४८ किलो| ₹१९,२००
धणे पावडर| २८८ किलो| ₹१,९५,२००
सुपर मिक्स गरम मसाला| २१६ किलो| ₹७५,६००
स्पेशल मिक्स काळा मसाला| ६६४ किलो| ₹२,६६,४००
काळा मसाला| ३३८ किलो| ₹२,३६,६००
मिरची पावडर| ३३८ किलो| ₹२,७०,४००
एकूण| २,२३० किलो| ₹११,८६,२००
सणासुदीच्या काळात FDA ची विशेष मोहीम
सण-उत्सवांच्या काळात बाजारपेठेत अन्नपदार्थांची मागणी वाढते. या काळात ग्राहकांना सुरक्षित आणि दर्जेदार अन्नपदार्थ उपलब्ध व्हावेत, यासाठी अन्न व औषध प्रशासनाकडून विशेष तपासणी मोहीम राबवली जात आहे. अन्नपदार्थांच्या पॅकिंगवर चुकीची माहिती देणे, लेबलिंगविषयक नियमांचे उल्लंघन करणे किंवा निर्धारित गुणवत्ता निकषांचे पालन न करणे, अशा प्रकारांवर प्रशासनाचे लक्ष आहे.
नागरिकांच्या आरोग्याशी संबंधित बाबींमध्ये कोणतीही तडजोड केली जाणार नसून, अन्नपदार्थांबाबत नियमांचे उल्लंघन करणाऱ्या व्यावसायिकांविरुद्ध आगामी काळातही कठोर कारवाई सुरू राहील, असा इशारा अन्न व औषध प्रशासनाने दिला आहे.