नागपूरमध्ये घडलेल्या एका घटनेने सगळ्यांचेच डोके चक्रावून सोडले आहे. एका व्यक्तीने भाड्याच्या खोलीत ३७ लाख रुपये किमतीच्या बनावट ५०० रुपयांच्या नोटा छापल्या. भाडे न भरल्याच्या वादातून हे कृत्य केल्याचे सांगितले जात आहे. भाडेकरू अनेक दिवस गैरहजर राहिल्याने घरमालकाने खोलीचे कुलूप तोडल्यावर हे रॅकेट उघडकीस आले. वाठोडा पोलीस घटनास्थळी पोहोचले तेव्हा खोलीत बनावट नोटांचे बंडल, एक प्रिंटर आणि छपाईचे साहित्य पाहून त्यांना धक्काच बसला. पोलिसांनी अर्धवट छापलेल्या नोटा आणि अंदाजे ४८ लाख ररुपये किमतीचे इतर साहित्यही जप्त केले.
आरोपीची ओळख नागपूरमधील त्रिमूर्ती नगर येथील रहिवासी पुष्पक कृष्ण भांडारकर उर्फ बेंडाणे अशी पटली असून तो सध्या फरार आहे. पोलिसांनी त्याचा शोध सुरु केला आहे. मिळालेल्या माहितीनुसार, पुष्पकने सुमारे दीड वर्षांपूर्वी खरबी परिसरात एक खोली भाड्याने घेतली होती. त्याचा भाडेकरार जानेवारी महिन्यात संपला होता आणि त्याने कथितरित्या अनेक महिने भाडे देणे बंद केले होते. जेव्हा घरमालक रमेश यांनी त्याला जागा खाली करण्यास सांगितले तेव्हा पुष्पकने त्यांना चाकूने धमकावल्याचा आरोप आहे. त्यानंतर रमेश यांनी वाठोडा पोलिसांशी संपर्क साधला, जिथे अदखलपात्र तक्रार नोंदवण्यात आली.
कर्नाटकच्या म्हैसूर जिल्ह्यातील हुनसूर तालुक्यातून एक अत्यंत धक्कादायक आणि खळबळजनक घटना समोर आली आहे. अनैतिक संबंधांच्या आड येणाऱ्या पतीचा काटा ...
भाडेकरू बऱ्याच काळापासून खोलीत आला नसल्याने घरमालकाने अखेरीस शनिवारी हातोड्याने कुलूप तोडले. आत शिरल्यावर त्याला एका बादलीत नोटांचे बंडल, इकडेतिकडे विखुरलेले कागद आणि खोलीत लावलेला प्रिंटर दिसला. हा प्रकार उघडकीस आल्याने सावध झालेल्या रमेशने तात्काळ पोलिसांना कळवले. पोलिसांनी पथके घटनास्थळी पोहोचली आणि त्यांना ५०० रुपयांच्या बनावट नोटांचे बंडल आढळले. जप्त केलेल्या चलनाच्या प्रमाणाचे मूल्यांकन करण्यासाठी एक मोजणी यंत्र आणण्यात आले. प्राथमिक तपासात असे दिसून आले की, आरोपीने कथितरित्या ३७ लाख रुपयांच्या बनावट नोटा छापल्या होत्या.
तपास अधिकाऱ्यांना अर्धवट छापलेल्या चलनी नोटा आणि छपाईचे साहित्यही सापडले. जप्त केलेल्या नोटा आणि साहित्याचे एकूण मूल्य अंदाजे ४८ लाख रुपये असल्याचा अंदाज आहे. पोलिसांनी संपूर्ण साहित्य जप्त केले असून पुष्पकचा शोध सुरु केला आहे. तपस अधिकाऱ्यांनी त्याच्याशी संपर्क साधला असता तो मुंबईत असल्याचे समजले. त्याचा शोध घेऊन त्याला अटक करण्यासाठी पोलिसांचे एक पथक मुंबईत पाठवले जाण्याची शक्यता आहे.
