मुंबई : बॉलिवूडचा 'किंग ऑफ रोमान्स' आणि जगभरातील करोडो चाहत्यांच्या मनावर राज्य करणारा अभिनेता शाहरुख खान आज त्याचा ६१ वा वाढदिवस साजरा करत आहे. गेल्या तीन दशकांहून अधिक काळाच्या कारकिर्दीत शाहरुखने आपल्या अभिनयाची अशी जादू चालवली आहे की, प्रत्येक पिढी त्याच्या प्रेमात पडली. रोमँटिक हिरोपासून ते डार्क अँटी-हिरो आणि आताच्या धडाकेबाज ॲक्शन अवतारापर्यंत, शाहरुखने प्रत्येक भूमिकेत स्वतःचे वेगळे स्थान निर्माण केले. शाहरुख खानच्या वाढदिवसानिमित्त पाहूयात त्याच्या कारकिर्दीला सुवर्णमोड देणाऱ्या ९ आयकॉनिक चित्रपटांवर एक विशेष नजर :
१. बाझिगर (१९९३) – कारकिर्दीतील मोठा टर्निंग पॉईंट
1/9
'बाझिगर' हा चित्रपट शाहरुख खानच्या कारकिर्दीतील सर्वात मोठा ब्रेकथ्रू मानला जातो. अब्बास-मस्तान दिग्दर्शित या चित्रपटात शाहरुखने नकारात्मक पण मुख्य भूमिका साकारली होती. या ब्लॉकबस्टर चित्रपटाने शाहरुखला बॉलिवूडमध्ये मुख्य अभिनेता म्हणून भक्कम ओळख मिळवून दिली. या चित्रपटात त्याच्यासोबत काजोल आणि शिल्पा शेट्टी मुख्य भूमिकेत होत्या.
२. डर (१९९३) – 'क-क-क किरण' अन् डार्क रोलचा थरार
2/9
'बाझिगर'च्याच वर्षी आलेला 'डर' हा चित्रपट शाहरुखच्या कारकिर्दीतील आणखी एक मैलाचा दगड ठरला. यात त्याने एका वेड्या प्रेमीची (अँटी-हिरो) भूमिका साकारली होती. यश चोप्रा दिग्दर्शित या चित्रपटात सनी देओल आणि जुही चावला मुख्य भूमिकेत होते. शाहरुखच्या संवादांनी आणि अभिनयाने प्रेक्षकांना खिळवून ठेवले.
३. दिलवाले दुल्हनिया ले जायेंगे (१९९५) – ग्लोबल रोमँटिक स्टार
3/9
आदित्य चोप्रा दिग्दर्शित 'DDLJ' या चित्रपटाने शाहरुखला जगभरात 'रोमँटिक हिरो' म्हणून नवी ओळख दिली. शाहरुख आणि काजोलची केमिस्ट्री आजही भारतीय सिनेसृष्टीतील सर्वात लोकप्रिय जोडी मानली जाते. हा चित्रपट केवळ बॉक्स ऑफिसवरच प्रचंड यशस्वी ठरला नाही, तर आजही प्रेक्षकांच्या मनावर अधिराज्य गाजवत आहे.
४. देवदास (२००२) – अभिनयाचा सुवर्णकाळ
4/9
संजय लीला भन्साळी दिग्दर्शित 'देवदास' मधील शाहरुखचा अभिनय समीक्षक आणि चाहत्यांच्या पसंतीस उतरला. ऐश्वर्या राय आणि माधुरी दीक्षित यांच्यासोबतचा त्याचा अभिनय, भव्य सेट आणि आयकॉनिक संवाद आजही सोशल मीडियावर ट्रेंड होत असतात.
५. चक दे! इंडिया (२००७) – देशभक्तीचा नवा निखरा अंदाज
5/9
शमित अमीन दिग्दर्शित 'चक दे! इंडिया' या चित्रपटात शाहरुखने भारतीय महिला हॉकी संघाचे प्रशिक्षक 'कबीर खान' यांची भूमिका साकारली होती. त्याचा "७० मिनिट..." हा संवाद आजही अंगावर काटा आणतो. स्वातंत्र्यदिन आणि प्रजासत्ताक दिनाला हा चित्रपट आजही अत्यंत आवडीने पाहिला जातो.
६. माय नेम इज खान (२०१०) – 'माय नेम इज खान अँड आय एम नॉट अ टेररिस्ट'
6/9
करण जोहर दिग्दर्शित या चित्रपटात शाहरुखने ऑटिझमग्रस्त मुस्लिम व्यक्तीची (रिझवान खान) आव्हानात्मक भूमिका साकारली होती. ९/११ च्या हल्ल्यांनंतरच्या परिस्थितीवर भाष्य करणारा हा चित्रपट शाहरुखच्या कारकिर्दीतील सर्वात प्रभावशाली आणि संवेदनशील चित्रपटांपैकी एक मानला जातो. यात त्याच्यासोबत काजोल मुख्य भूमिकेत होती.
७. डॉन फ्रँचायझी (२००६ व २०११) – स्टायलिश अन् डॅशिंग गुन्हेगार
7/9
फरहान अख्तर दिग्दर्शित 'डॉन' आणि 'डॉन २' मधील शाहरुखचा स्टायलिश आणि क्लासिक गुन्हेगाराचा अवतार चाहत्यांना खूप आवडला. प्रियंका चोप्रासोबतच्या या फ्रँचायझीने बॉक्स ऑफिसवर तुफान कमाई केली आणि शाहरुखच्या 'डॉन'च्या लुकने तरुणाईला वेड लावले.
८. चेन्नई एक्सप्रेस (२०१३) – कॉमेडीचा धमाका
8/9
रोहित शेट्टी दिग्दर्शित 'चेन्नई एक्सप्रेस'ने प्रेक्षकांना हसवून लोळवले. मुंबईहून रामेश्वरमला जाणाऱ्या ट्रेनमध्ये चुकून चढलेला व्यापारी आणि दाक्षिणात्य डॉनच्या मुलीची (दीपिका पदुकोण) ही धमाल कथा ब्लॉकबस्टर ठरली. शाहरुखच्या कॉमिक टायमिंगचे यात खूप कौतुक झाले.
९. जवान (२०२३) – ग्रँड कमबॅक अन् ऑल टाईम ब्लॉकबस्टर
9/9
काही काळ अपयशाचा सामना केल्यानंतर, ॲटली दिग्दर्शित 'जवान' चित्रपटाने शाहरुख खानचे बॉलिवूडमध्ये दणकेबाज पुनरागमन घडवून आणले. नयनतारा आणि दीपिका पदुकोण यांच्या प्रमुख भूमिका असलेल्या या मास ॲक्शन चित्रपटाने बॉक्स ऑफिसचे सर्व रेकॉर्ड मोडून काढले आणि 'किंग खान' आजही बॉलिवूडचा बॉस आहे हे पुन्हा सिद्ध केले.
