Satara District Bank : महाराष्ट्रातील अहिल्यानगर, सातारा आणि सांगली जिल्हा मध्यवर्ती सहकारी बँकांच्या निवडणुकांची मतमोजणी सुरू असून, या निकालांकडे संपूर्ण राज्यातील राजकीय वर्तुळाचे लक्ष लागले आहे. जिल्हा बँकांवरील वर्चस्व मिळवण्यासाठी विविध राजकीय गटांमध्ये चुरस पाहायला मिळत आहे. दरम्यान, साताऱ्यात एकनाथ शिंदे यांच्या शिवसेनेला पहिला विजय मिळाला आहे. पालकमंत्री शंभूराज देसाई यांनी पाटण विकास सेवा सोसायटी मतदारसंघातून बाजी मारली आहे.
सांगली : सांगली जिल्हा मध्यवर्ती सहकारी बँकेच्या निवडणुकीच्या मतमोजणीत जत सोसायटी गटातून आमदार गोपीचंद पडळकर यांनी विजय मिळवला आहे. मिरजेतील ...
शंभूराज देसाईंचा सत्यजितसिंह पाटणकरांना धक्का
सातारा जिल्हा मध्यवर्ती सहकारी बँकेच्या निवडणुकीत पाटण विकास सेवा सोसायटी मतदारसंघात चुरशीची लढत पाहायला मिळाली. या निवडणुकीत पालकमंत्री शंभूराज देसाई यांनी भाजपचे पारंपरिक प्रतिस्पर्धी सत्यजितसिंह पाटणकर यांचा पराभव केला. त्यामुळे या मतदारसंघात शिंदे यांच्या शिवसेनेने विजय मिळवला आहे.
देसाई यांच्या विजयाची घोषणा होताच मतमोजणी केंद्राबाहेर समर्थकांनी जल्लोष केला. कार्यकर्त्यांनी विजयाच्या घोषणा देत आनंद व्यक्त केला. या निकालामुळे सातारा जिल्हा बँकेच्या निवडणुकीत शिंदेसेनेच्या गोटात उत्साहाचे वातावरण निर्माण झाले आहे. पाटण सोसायटीत शंभुराज देसाई यांना 42 वर्षांनी विजय मिळाला आहे.
सातारा जिल्हा बँकेच्या निवडणुकीत प्रतिष्ठेच्या झालेल्या लढतीत जयकुमार गोरे यांनीही बाजी मारली. माण सोसायटी गटातून जयकुमार गोरे यांनी त्यांचे बंधू शेखर गोरे यांचा पराभव केला. जयकुमार गोरे यांना 53 मतं मिळाली.
सांगली जिल्ह्यांतील निकाल
सांगली जिल्हा मध्यवर्ती सहकारी बँकेच्या निवडणुकीत भाजप आमदार गोपीचंद पडळकर यांनी दणदणीत विजय मिळवलाय. जत सोसायटी गटातून गोपीचंद पडळकर यांना 54 मतं मिळाली, तर महाविकास आघाडीचे उमेदवार विनोद पवार यांना 34 मतं मिळाली आहेत. तब्बल 20 मतांनी पडळकरांनी विजय मिळवत जिल्हा बँकेत दमदार एन्ट्री केली आहे. त्यांच्या विजयानंतर मतमोजणी केंद्राबाहेर समर्थकांनी एकच जल्लोष केला